TIRANE- Nuk do të jenë vetëm bizneset ato që do penalizohen me gjoba të rënda nëse nuk lëshojnë kuponin tatimor: të njëjtin fat do ta kenë edhe ata qytetarë të cilët nuk e tërheqin në çastin kur blejnë një produkt apo shërbim.

“Blerësi ose përfituesi i shërbimit, i cili gjatë kontrollit rezulton se nuk disponon kupon tatimor për mallrat ose shërbimet e blera, në një distancë jo më shumë se 30 metra nga vendi i daljes së njësisë së shitjes së mallit ose shërbimit, dënohet me një gjobë prej 1,000 lekë”, përcakton Ligji për Procedurat Tatimore. Ndërkohë që dënimet më të rënda, sipas këtij ligji, i rezervohen subjekteve të paregjistruara në QKR, raste kur parashikohet edhe mbyllja e veprimtarisë dhe konfiskimi i të gjitha materialeve e mallrave, për të arritur deri te ndjekja penale.

Kuponi tatimor
Për çdo konstatim të mos lëshimit të kuponit tatimor, ligji parashikon gjobë në masën 200,000 lekë për bizneset e mëdha, dhe gjobë, në masën 50,000 lekë për bizneset e tjera. Për çdo konstatim tjetër pas verifikimit të parë, dënohet me  gjobë në masën 300,000 lekë për bizneset e mëdha dhe gjobë, në masën 100,000 lekë për bizneset e tjera. Për çdo konstatim të përsëritur të moslëshimit të kuponit tatimor, pas aplikimit të dy dënimeve administrative, administrata tatimore bën kallëzim penal për biznesin.