Demokratët e Fierit i janë drejtuar këtë të shtunë kutive të votimit për të zgjedhur kryetarin e ri të degës së Partisë Demokratike. Në garë për drejtimin e degës janë zyrtarizuar emrat e pesë kandidatëve: Ardian Ferro, Enkelejda Veliu, Fatjon Semanjaku, Gentian Koçi dhe Festim Meta.

Drejt kutive të votimit për të zgjedhur kryetarin e ri të degës do të drejtohen 3 800 anëtarë, ndërkohë që, pas rishikimit të listave, numri i anëtarëve demokratë është reduktuar ndjeshëm, pasi më parë numëroheshin rreth 8 000.

Ndërkohë, zgjedhjet në PD-në e Fierit nuk u zhvilluan në kohën e parashikuar nga statuti, ndryshe nga degët e tjera të vendit. Gjatë kësaj kohe u krijua një grup pune i përbërë nga 43 anëtarë, me qëllim riorganizimin e degës pas disfatës së thellë të 11 majit, e cila solli një sërë dorëheqjesh në degën e Fierit. Në këtë periudhë, kryetar i komanduar u vendos Ardian Ferro.

Zgjedhjet e 7 nëntorit kanë sjellë përplasje mes demokratëve në Fier. Vetëm pak ditë më parë, ish-kreu i degës, Rrapi Gjika, reagoi publikisht në rrjetet sociale, ku theksoi se, për shkak të mullizimit dhe gazifikimit të partisë, zgjedhjet u shtynë për të vendosur kryetarin që duan Noka dhe Bardhi, në një proces ku, sipas tij, listat janë manipuluar dhe fituesi është paracaktuar.

Pavarësisht kontestimeve, demokratët e Fierit do të përcaktojnë me votën e tyre drejtuesin e ri të degës. Procesi i votimit ka nisur në orën 08:00 dhe do të përfundojë në orën 18:00.

lajm në perditesim...