Tirana është ‘pushtuar’ nga kaosi dhe dhuna për shkak të protestës që po zhvillohet prej tre ditësh. Analisti Ilir Demalia i ftuar në “Frontline” reagoi ashpër ndaj shkatërrimit të bizneseve, pronës private dhe bankave, duke e cilësuar dhunën si një akt që nuk i përket një shoqërie të qytetëruar

“Kjo është kafshëri! Kafshëri është kjo e atyre që thyen bizneset e atyre njerëzve hallexhinj. Çfarë dëmtoi Edi Ramën kjo? Dëmtoi Partinë Socialiste? Pronën private të njerëzve që e kanë bërë me gjak! Nuk bëjnë studentët ashtu, nuk bëjnë njerëzit e qytetëruar ashtu. Dhuna sjell dhunë”, tha Ilir Demalia.

Ndërsa tha se qytetarët kanë një mijë arsye për të protestuar, Demalia u shpreh se protesta është edhe tregues i mungesës së institucioneve demokratike që u japin qytetarëve mundësi të reagojnë.

Pa dyshim që ka një mijë arsye për të protestuar. Unë jam pro të gjitha protestave, qoftë edhe kur del një njeri i vetëm.

“Kjo klasë politike ka 35 vjet që e mban peng Shqipërinë. Edhe ata që kanë punuar për këtë klasë politike, kur dalin nga politika, duan përsëri lugën e çorbës. Kjo protestë tregon se ne nuk kemi ndërtuar mekanizma dhe institucione demokratike. Një qeveri teknike minimumi një vit, të bëhen të gjitha reformat e të liberalizohet tregu politik”, theksoi Demalia.