Akuza se ndërhyri për dënimin e kundërshtarit të tij 6 muaj para zgjedhjeve, Erdogan: Qytetarët të mos injorojnë vendimin e gjykatës

Dënimi me dy vite burg i kryebashkiakut të Stambollit, Ekrem Imamoglu ka shkaktuar reagime të shumta në Turqi. Mijëra qytetarë kanë mbushur sheshet, duke e gjykuar këtë si një vendim politik të presidentit turk, Tajip Erdogan 6 muaj para se të mbahen zgjedhjet presidenciale.

Erdogan ka reaguar lidhur me dënimin e Imamoglu, duke deklaruar se nëse ishte bërë ndonjë gabim, gjykatat do ta korrigjonin, ndërsa në të kundërt, qytetarët nuk duhet të kundërshtojnë dhe shpërfillin vendimet e gjykatës. Sa i takon kritikave se dënimi i Imamoglu ishte bërë pak muaj para zgjedhjeve presidenciale sepse ky i fundit shihej si kundërshtar i fortë, Erdogan u përgjigj duke thënë se nuk i interesonte se kë do të kishte përballë në zgjedhje.

Një gjykatë e Stambollit dënoi të mërkurën kryebashkiakun e Stambollit për fyerje të anëtarëve të Këshillit të Lartë Zgjedhor të Turqisë në vitin 2019.

"Nuk ka ende një vendim gjyqësor përfundimtar. Çështja do të shkojë në Gjykatën e Apelit dhe në Gjykatën e Lartë . Nëse gjykatat kanë marrë një gabim, do të rregullohet. Ata po përpiqen të na tërheqin në lojë”, tha presidenti turk.
Dënimi i Imamoglu ka mbledhur bllokun e opozitës rreth asaj që e sheh si një luftë për demokracinë, shtetin e së drejtës dhe drejtësinë. Mijëra qytetarë morën pjesë në protestat nën Imamoglun, i cili ka thënë se ka në plan të apelojë vendimin e shkallës së parë.

"Ka pasur shumë vendime gjyqësore, të cilat ne vetë i kemi kritikuar ashpër, por kjo nuk i jep askujt të drejtën të ofendojë gjyqtarët apo të injorojë vendimet e gjykatës ," tha Erdogan në një tubim në Mardin, Turqinë juglindore.

Kritikët argumentojnë se autoritetet gjyqësore të Turqisë i janë dorëzuar dëshirës së Erdogan për të ndëshkuar kritikët e tij. 

B.V/SI.E./Shqiptarja.com

TAG:
• turqi
• erdogan