Alarmi për terrorizëm islamik në Ceuta është konkret. Pas mobilizimit në rrjetet sociale dyshohet se ka një “dorë organizuese”. Kriza diplomatike mes Italisë dhe Spanjës nuk buron vetëm nga përplasja politike mes modelit socialist të Pedro Sánchez dhe atij konservator të Giorgia Melonit. Në themel të saj qëndron mbi të gjitha rreziku që enklava spanjolle, për shkak edhe të historisë së saj, të mund të shndërrohet në një qendër “radikalizimi dhe rekrutimi xhihadist”. Disa dhjetëra persona me origjinë nga kjo zonë janë larguar në të kaluarën për të luftuar në Siri dhe Irak.

Kjo është tabloja që shërbimet e inteligjencës i kanë paraqitur qeverisë italiane. Dosja është hartuar edhe mbi bazën e informacioneve të shkëmbyera gjatë këtyre orëve me shërbimet sekrete spanjolle. Ndërkohë, inteligjenca italiane po monitoron mobilizimin në rrjetet sociale për një valë të re të paralajmëruar emigrantësh drejt Ceutës. Sipas informacioneve, ajo mund të ndodhë edhe përpara 15 gushtit, datë që është përhapur ditët e fundit përmes një fushate në rrjetet sociale.

“Le të godasim më 10 dhe jo më 11. Ka manifestime më datë 9”, shkruhet në disa biseda private në WhatsApp, të shpërndara në grupet e Facebook-ut që po monitorohen. Nga diskutimet e analizuara “vërehet tashmë një tendencë për ta afruar datën” e një vale të re masive emigrantësh. Në informacionet e rezervuara që kanë mbërritur në tryezën e qeverisë përmenden gjithashtu disa pika të ndryshme nisjeje.

Bisedat dhe rrjetet sociale

Bëhet fjalë për një mekanizëm të organizuar shpërndarjeje të informacionit nga një platformë në tjetrën. Ata që po promovojnë eksodin e ri janë përdorues të TikTok-ut, “shpesh administratorë të disa grupeve njëkohësisht dhe përdorues të numrave telefonikë marokenë”, të cilët shpërndajnë në grupet e Facebook-ut lidhje që të çojnë në biseda në WhatsApp.

Ndryshe nga vala e mëparshme e emigrantëve, administratorët e këtyre grupeve të shumta nuk janë anonimë. Në grupet e Facebook-ut zhvillohet faza e dytë. Lidhjet që të çojnë te bisedat ku organizohen lëvizjet shpërndahen nga përdorues që nuk publikojnë përmbajtje të tjera. Aktiviteti i tyre është i përqendruar vetëm në këtë çështje. Madje, sipas analizës, “një numër i kufizuar anëtarësh përdorin të njëjtin numër në disa grupe”.

Por ka edhe një tjetër element. Sipas raportit, telefonat e përdorur nga këta persona kanë numra që vijnë nga vende të ndryshme, mes tyre Shtetet e Bashkuara, Egjipti, Algjeria, Tunizia, Libia dhe Senegali.

Sipas informacioneve në dispozicion, në këto grupe veprojnë persona “me interesa hetimore, të inteligjencës, gazetareske, akademike ose personale”. Për inteligjencën italiane, është duke u zhvilluar “një koordinim i fushatës” së mobilizimit për një eksod të ri emigrantësh drejt Ceutës, me mundësinë që data e planifikuar për të shtunën e ardhshme “të afrohet”.

Për momentin, kjo “dorë organizuese” nuk mund t'i atribuohet një aktori të caktuar.

Ka gjithashtu një tjetër alarm. Grupet e monitoruara në Facebook po shfrytëzohen edhe nga “trafikantë të qenieve njerëzore”, të gatshëm të përfitojnë nga njerëzit në dëshpërim, pikërisht në një moment kur Ceuta është në qendër të vëmendjes së Evropës dhe botës, si dhe të përplasjes mes dy qeverive.

Alarmi për terrorizëm

Frika se pas migrimit masiv mund të fshihet edhe rekrutimi dhe radikalizimi i personave drejt terrorizmit është hedhur e zezë mbi të bardhë në raport. Dhe nuk do të ishte diçka e re.

Në veçanti, në Fnideq (Castillejos), vetëm pak kilometra larg Ceutës, zona “ka qenë shpesh objekt i operacioneve të përbashkëta antiterrorizëm mes Spanjës dhe Marokut për të çmontuar rrjete xhihadiste ndërkufitare”.

Rreziqet për “sigurinë dhe terrorizmin për Italinë” u përmendën edhe të premten në njoftimin e Palazzo Chigi-t, me të cilin u bë e ditur vendimi për të mos rihapur menjëherë Schengenin, pavarësisht ultimatumit të Madridit.

Lëvizjet e Spanjës

Mundësia e një vale të re emigrantësh drejt Ceutës po merret shumë seriozisht edhe nga qeveria e Pedro Sánchez. Këtë e tregon sistemi i sigurisë i ngritur në zonat kufitare, edhe në bashkëpunim me autoritetet marokene.

Nga Madridi i është bërë me dije Romës se është përforcuar barriera pneumatike lundruese, rreth 500 metra e gjatë, e vendosur përgjatë kufirit detar me Marokun.

Por masat nuk përfundojnë këtu. “Santa Maria” dhe “Navarra”, dy fregata të Marinës Ushtarake spanjolle, po patrullojnë gjirin.

Ndërkohë, rreth 2 mijë ushtarakë janë dislokuar në enklavë, krahas një numri “të shtuar ndjeshëm” efektivësh të Guardia Civil dhe Policía Nacional. Edhe në Melilla janë vendosur dronë dhe është shtuar mbikëqyrja aktive e kufirit.

Për qeverinë spanjolle, këto masa janë “të përshtatshme” për të përballuar dhe zmbrapsur një krizë tjetër të mundshme. Ndërsa raportimet e qeverisë marokene flasin për një situatë aktualisht “të qëndrueshme” në Ceuta dhe Melilla.

Të miturit e pashoqëruar që mbërritën më 30 dhe 31 korrik do t'u nënshtrohen procedurave të identifikimit dhe, në respekt të legjislacionit spanjoll, do të riatdhesohen.

Prania e tyre, sipas vlerësimeve aktuale, “nuk paraqet elemente të një rëndësie të veçantë kritike”. Megjithatë, këto zona vazhdojnë të përdoren “si pika grumbullimi nga persona që synojnë të tentojnë kalimin e paligjshëm të kufirit”./Corriere Della Sera