Aleati i Bashës në Report Tv: Për qeverinë e re gati për koalicion me PS...Jo me Ramën, Braçe kryeministër

TIRANE-Një nga besnikët e Bashës në opozitën e bashkuar nuk përjashton një koalicion me socialistët në 2021-shin nëse votat e tij do të nevojiten për qeverinë e re. Kjo nuk do të ndodhë me Ramën thotë ai, pasi preferon Erion Braçen kryeministër.

Aleati i Partisë Demokratike, kryetari i PAA-së, Agron Duka i ftuar në studion e Report Tv përballë gazetarit u shpreh se sondazhet nxjerrin koalicionin opozitar fitues të zgjedhjeve të ardhshme parlamentare. "Nëse ne kandidojmë, opozita e bashkuar në koalicion, përballë PS-së e vetme, në kërkim të ndonjë aleati, fiton opozita, në cdo sondazh.

Koalicioni është i fortë. Vetëm nuk qeveris LSI-ja, qeveris me atë tjetrën, prostitucioni nuk bëhet vetëm, do partner, prandaj akuzo atë tjetrën, që sa herë i duhet për të qeverisur i bën ofertë tjetrës. Mos bëni diversione. Vetë Rama me natyrën e tij ka larguar gjithmonë aleancat" tha ai.

I pyetur nëse koalicioni opozitar nuk arrin të vijë në pushtet në 2021, a do të kërkojë dorëheqjen e Lulzim Bashës, ai tha "E para nuk më takon mua, sepse nuk jam anëtar i PD-së. Atë mund ta bëjë PD-ja nëse, por unë nuk mendoj se mund të ndodhë një gjë e tillë" tha ai.

Por çfarë ndodh nëse ndalohen koalicionet parazgjedhore? "Nuk ndodh kurrë. Marrëveshja nuk mund të shkelet, nëse ndodh do të konkurrojmë vetëm dhe pastaj zgjedhjet janë normale në bazë të peshës". Nëse nuk ka koalicione parazgjedhore, a përjashton Agron Duka një koalicion me PS-në pas zgjedhjeve?

"Edhe mund të ndodhë. Nëse ne marrim aq deputetë sa i duhen forcës që do të fitojë dhe në rastin konkret mund të jetë PS, por pa Ramën, unë personalisht me Ramën nuk mund të bëj koalicion, ne jemi thyer njëherë për atë punë" tha ai. Por kush mund të jetë tjetër? "PS ka shumë figura".

Për shembull zoti Braçe?  "Po, edhe ai mund ta bëjë, shumë i mirë është, ka shumë eksperiencë dhe shumë më shumë kontribute sesa Rama në PS, që është konvertuar socialist kohët e fundit, ka qenë rilindas. Në jetën politike ka qenë simpatizant i opozitës aso kohe, anti-konformist, pak rebel, që i pëlqente mendja e tij e pa përshtatur nga forca që ka dalë më vonë u konvertua, filloi të vishej me kollare" tha ai.

Por si e komenton ai ngërçin e fundit mbi KQZ për draftin e reformës zgjedhore dhe si e shikon fundin? "Janë momentet e fundit që rezistohet për të fituar se cila palë. Reforma po mbahet peng nga shumica. U arrit marrëveshja përmes presionit ndërkombëtar edhe pse kemi zotime që këto të jenë të fundit, por shoh që jemi larg, pasi presioni ndërkombëtar vijon. PE na kondicionon për 15 kushte. Nëse do të arrihet që të realizohen kërkesat politike, mendoj që jeta mund të rikthehet në një farë normaliteti".

Por a e shikon Duka marrëveshjen si pazarin e ri mes Ramës dhe Bashës? "E njëjta punë është bërë gjithmonë, sa herë që partitë e mëdha kanë dashur të arrijnë dicka kanë nxjerrë si justifikim stabilitetin e vendit. Reforma do të ishte e plotë nëse do të kishim edhe ndryshimin e sistemit zgjedhor, ndoshta me lista të hapura. Një reformë kirurgjikale do të ishte kjo.

Komisionet zgjedhore janë motamo njëlloj, partitë e vogla nuk kanë. Marrëveshja ka disa anë pozitive  nëse do të shoqërohen me ato kushte. Mendoj se do të realizohet identifikimi biometrik, financimi i partive, apo probleme të tjera, nëse do të arrihen ato kushte.

Nëse gjithë këto pika realizohen mendoj se kemi arritur dicka duke pranuar një reformë më tepër për stabilitet se atë që duhet të bënte. Në cdo prononcim publik kam qenë një ndër ata që kam shtruar problemin e sistemit, pasi nuk mendoj se është i drejtë, sistemi duhet patjetër të ketë elementë mazhoritar" tha ai.

Në fund, Duka tha se legalizimi i kanabisit mjekësor që paralajmëroi kryeministri Edi Rama disa javë më parë, duhet të kalojë më parë në diskutime të gjera, pasi dëmton bujqësinë. "Besoj se ka dëmtime megjithatë kjo është një temë e gjerë. Duhet me shumë kujdes, në këto momente nuk mund të bëhet, kemi një situatë atipike politike, nuk mundet që një forcë politike pa opozitë reale, të mundet të miratojë një ligj kontravers.

Mund të diskutohet kur të kemi një pushtet vendor të ndarë të konsoliduar. Mund të ketë dëme për bujqësinë shqiptare, mund të largohen nga kulturat tradicionale. Gjithsesi duhet një diskutim i gjerë dhe një mendim i të gjithë forcave politike për të parë nga anon" përfundoi ai.

/r.k./Shqiptarja.com

TAG:
• lulzim basha
• erjon brace
• reforma zgjedhore
• agron duka
• kanabisi mjekesor