Po zhvillohet mbledhja e Këshillit të Mandateve, i cili pritet të dalë me një vendim mbi imunitetin e deputetit socialist, Saimir Tahiri. Një ditë më parë, Prokuroria i kërkoi Kuvendit arrestimin e deputetit Tahiri, si të përfshirë në trafik droge.

I pranishëm në mbledhje është edhe shefi i Prokurorisë së Krimeve të Rënda, Besim Hajdarmataj, i cili është vënë përballë një sërë pyetjesh nga deputetët. Demokrati Enkelejd Alibeaj e ka pyetur Hajdarmatajn nëse mund të largohet Tahiri nga vendi dhe të prishë provat. Prokurori nuk e ka mohuar një gjë të tillë, duke thënë se edhe mund të ndodhë.

Pyetjet-përgjigjet:
Manja: I kërkohet këshillit dhënia e autorizimin për arrestin e deputetit apo heqja e imunitetit?

Hajdarmataj: Ne i kemi kërkuar autorizim për heqjen e lirisë të deputetit Tahirit dhe kontroll persona e të banesës së tij.

Manja: Ne sot nuk kemi ardhur këtu për të kërkuar arrestimin e deputetit.

Hajdarmataj: Ne kemi ardhur me një kërkesë për arrestim dhe heqjen e lirisë të deputetit Tahiri. Kemi ardhur që iu të na hapni rrugë ne që të veprojmë duke respektuar të gjitha procedurat ligjore.

Alibeaj: A është regjistruar në regjistrin e veprës penale Tahiri?

Hajdarmataj: Është regjistruar emri i të gjithë personave, kemi regjistruar procedim penal të datës 17 dhe më pas kemi bërë dhe rrugë zyrtare për të gjithë personat e përfshirë në trafikun e lëndëve narkotike. Bashkë me ta kemi regjistruar edhe emrin e Tahirit.

Alibeaj: A mund të largohet Tahiri nga vendi dhe të prishë provat?

Hajdarmataj: Kemi dyshimin se mund të jemi përballë këtij rasti. Ne kemi filluar hetim duke e mbajtur në fshehtësi të plotë. Edhe mund të ndodhë që Tahiri të largohet.

d.c./shqiptarja.com