Paraditen e sotme Kryeprokurorja e sapozgjedhur Arta Marku priti në një takim Ambasadoren e Republikës Federale të Gjermanisë, znj. Susanne Schütz.

Në takimin e zhvilluar ditën e sotme diplomatja gjermane shprehu mbështetjen e vendit të saj për institucionin e Prokurorisë së Përgjithshme, si edhe vullnetin për forcimin e mëtejshëm të bashkëpunimit dy-palësh në fushën e sigurisë dhe të ndjekjes penale.

Marku shprehu vlerësimin për ndihmesën e madhe që kanë ofruar autoritetet gjermane për Prokurorinë Shqiptare, si në aspektin logjistik, ashtu edhe në koordinimin për hetime të përbashkëta.

Prokurori i Përgjithshëm garantoi ambasadoren Schütz se do të intensifikohet aktiviteti institucional në luftën kundër korrupsionit dhe trafiqeve të paligjshme, si edhe do të forcohet më tej bashkëpunimi vendas dhe ndërkombëtar në luftën kundër korrupsionit dhe trafiqeve të paligjshme.

Pas takimit me ambasadoren gjermane, Marku ka takuar edhe kreun e komanduar të SHISH, Helidon Bendon. 

Er.K/Shqiptarja.com