UASHNIGTON - Një anketë e re tregon se mbështetja për luftën në Afganistan në mesin e amerikanëve është më e ulët se sa ajo për luftën në Vietnam më shumë se 40 vjet më parë.
 
Anketa e kanalit televiziv CNN dhe organizatës ORC International tregon se vetëm 17 për qind e publikut amerikan mbështetë luftën afgane, ndërsa 82 për qind e kundërshtojnë atë.
 
Kjo është shumë më e ulët se mbështetja prej 52 për qind që publiku amerikan i kishte dhënë kësaj lufte katër vjet më parë. Anketa gjithashtu tregon se vetëm rreth 30 për qind e të anketuarve besojnë se Shtetet e Bashkuara po e fitojnë luftën në Afganistan.
 
Anketa e kanalit televiziv CNN thotë gjithashtu se shumica e amerikanëve janë në favor të tërheqjes së trupave amerikane nga Afganistani para fundit të viti 2014, afati i caktuar nga Presidenti Barak Obama.
 
Një anketë e ngjashme nga gazeta Washington Post dhe kanali televiziv ABC News javën e kaluar tregonte se shumica e njerëzve nuk mendojnë se angazhimi i Shteteve të Bashkuara në këtë luftë ishte i vlefshëm.
 
Redaksia online
(ac/shqiptarja.com)