Autoritetet saudite kanë deklaruar se rebelët Huthi kanë shënjestruar një kullë në qendrën financiare të kryeqytetit, Riad, duke shkaktuar dëme materiale në disa kate të ndërtesës dhe në objektet përreth. Sipas Mbrojtjes Civile Saudite, nga sulmi nuk ka persona të lënduar, ndërsa incidenti shënon një tjetër përshkallëzim të sulmeve ndaj territorit saudit.

Sulmi ndodhi disa orë pasi koalicioni i udhëhequr nga Arabia Saudite njoftoi se kishte kapur dhe shkatërruar katër raketa balistike të lëshuara drejt rajonit jugor të vendit. Zëdhënësi i koalicionit, gjeneralmajor Turki al-Maliki, bëri të ditur gjithashtu se forcat kishin shkatërruar një platformë për lëshimin e raketave, e përdorur në tentativat për të goditur Riadin.

Autoritetet saudite lëshuan disa paralajmërime emergjente në qytetet Abha dhe Khamis Mushait, në jugperëndim të vendit, përpara se të konfirmonin se rreziku kishte kaluar.

Ndërkohë, një avion saudit kreu sulme ajrore në Sana, kryeqytetin e Jemenit të kontrolluar nga Huthët. Një ditë më parë, rebelët morën përgjegjësinë për shënjestrimin e disa objektivave në Arabinë Saudite, përfshirë aeroportin ndërkombëtar dhe qendrën financiare në Riad.

Përshkallëzimi i luftimeve po rëndon edhe më tej situatën humanitare në Jemen. UNICEF njoftoi se më shumë se 330 mijë persona, përfshirë rreth 174 mijë fëmijë, janë zhvendosur që nga rifillimi i luftimeve.

Ndërkohë, Organizata Botërore e Shëndetësisë raportoi se bilanci i përshkallëzimit të fundit të konfliktit ka arritur në 2,260 viktima dhe 10,519 të plagosur, sipas të dhënave deri më 16 nëntor.

Konflikti i ripërtërirë ka vënë në rrezik edhe armëpushimin e ndërmjetësuar nga OKB-ja në vitin 2022, i cili kishte ndalur kryesisht shkëmbimin e sulmeve mes koalicionit të udhëhequr nga Arabia Saudite dhe rebelëve Huthi, që kontrollojnë zonat më të populluara të Jemenit.