Zv.Drejtori i Përgjithshëm i Burgjeve, Femi Sufaj, ka reaguar për emisionin ‘Frontline Interview’ në Report Tv lidhur me arratisjen e 'ushtarit' të Çopjave Altin Ndoci nga Spitali i Durrësit, ditën e djeshme.

Sipas Sufajt, Drejtoria e Përgjithshme e Burgjeve është informuar se Altin Ndoçi, i shoqëruar për vizitë tek kirurgu, është larguar nga ambientet e spitalit, ndërsa e cilësoi këtë si një ngjarje të rëndë.

Ai theksoi se drejtoria po vlerëson situatën për të marrë masa parandaluese në shoqërimin e të burgosurve drejt spitaleve apo gjykatave, me qëllim shmangien e rasteve të tilla në të ardhmen.

Sufaj sqaroi gjithashtu se arratisje të tilla janë shumë të rralla, ku e fundit ka qenë në vitin 2010.

‘Në 13 janar nga Drejtoria e Burgjeve jemi informuar se nga ambientet e spitalit Durrës ishte arratisur Altin Ndoçi që kishte shkuar për vizitë tek kirurgu. Menjëherë janë dërguar të dhëna në policinë e shtetit për shpalljen në kërkim dhe kërkimin e tij. Një ekip i Drejtorisë së Përgjithshme të Burgjeve ka shkuar në pranë institucionit të ekzekutimit të vendimeve penale Durrës po ashtu edhe Prokuroria e Rrethit dhe Shërbimi i Kontrollit të Brendshëm që po kryejnë verimet hetimore.

Drejtori i Përgjithshme ka pezulluar disa punonjës deri në përfundim të hetimeve. Kjo është një ngjarje e rëndë për burgjet dhe për komunitetin. Drejtoria është duke vlerësuar situatën për marrjen e masave parandaluese për shoqërimin e të burgosurve në spitale apo gjykata. Dua të sqarojë se ngjarje të tjera janë shumë të rralla, kjo është rasti i dytë pas një arratisje nga spitali në 2010 që u arrestua pas 24 orësh’, tha ai.

Për avokatin Arbër Hoxha përgjegjësia për transferimin dhe shoqërimin e të dënuarve i takon Policisë së Burgjeve. Sipas Hoxhës, bëhet fjalë për një person me rrezikshmëri të lartë, për të cilin masat e sigurisë duhej të ishin maksimale.

‘Transferimi i të dënuarve është detyrë e policisë së burgjeve. Kishim të bënim me një person me rrezikshrëmi të lartë dhe numri i policëve që duhet ta shoqëronin duhet të ishte 5. Ai duhej të ishte nën pranga dhe zinxhirë, këto masa kanë dështuar sepse ishte një numër i vogël punonjësish policie dhe pa pranga. Kemi të bëjmë me neglizhencë të grupit që ka bërë transportimin e tij drejt spitalit.

Nga ana e tij janë marrë masa që të ketë mundësi të largohet. Largimi nga vendi i qëndrimit i të burgosurit dënohet nga 2 deri në 3 vite burg. Është një ngjarje shumë e rëndë, sepse Veliaj shoqërohet me forca të shumta të policisë së burgjeve dhe persona që janë me rrezik të lartë shoqërohen me një ose me dy policë. Ka hije dyshimi , por ta lëmë Prokurorinë e Durrësit që të bëjë punën e saj’, tha ai.

S.B/A.M/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • goni: 14/01/2026 17:48

    Kriminelët bëjnë ligjin në burgjet shqipëtare prandaj nuk keni fytyrë të flisni të gjith duhet të shkarkohen dhe varësia e burgjeve duhet ti kaloi MB.

    Përgjigju
  • Sondazhi i ditës: 2 Shkurt, 13:24

    A e mbështesni kërkesën e gjyqtarëve për rritje page?

Lajme të tjera