Ish-drejtori i Përgjithëm të Policisë dhe Prokurori i Elbasanit duhet të vihen urgjentisht para drejtësisë për ngjarjen e rëndë të vrasjes së Pjerin Xhuvanit 4 ditë para zgjedhjeve të vitit 2021. Kjo është thirrja e ish-kryetarit të Partisë Demokratike, Lulzim Basha, i cili i akuzon ato se gënjyen për të fshehur të vërtetën e ngjarjes. Përmes një postimi në rrjetet sociale, Basha ka reaguar për arrestimin e 2 zëvendësdrejtorëve të policisë së Elbasanit dhe Beratit, teksa nënvizon se policia u vu në dispozicion të bandave.

“Çdo shqiptar e ka të qartë edhe më shumë sot se si Rama e ka përdorur policinë për të mbrojtur blerjen e votave. Vendimi i djeshëm tregon se si policia e shtetit u vu në shërbim të bandave me urdhër të Edi Ramës në masakrën zgjedhore të 25 prillit. Para drejtësisë duhet të vihen urgjentisht edhe ish-drejtori i policisë dhe prokurori i Elbasanit që gënjyen publikisht për të fshehur të vërtetën. Asnjë ushtar politik i sotëm apo i djeshëm i Suel Çelës nuk mund të manipulojë të vërtetën e kësaj ngjarje, ku policia dhe krimi u bënë bashkë për të blerë vota dhe që fatkeqësisht çoi në viktima”, shkruan Basha në Twitter.  

Albert Nushi dhe Nikollaq Palla, 2 ish- zv.drejtorë të Policisë në Elbasanin, janë lënë në arrest shtëpie pasi akuzohen se kanë dhënë dëshmi të rremë lidhur me vrasjen e Pjerin Xhuvanit në Elbasan , 4 ditë para zgjedhjeve të 25 prillit 2021, nga Struktura e Armatosur e Partisë Demokratike. Rezulati ka dalë në përfundim të hetimeve që kanë zgjatur më shumë se 1 vit, nga vrasja që tronditi opinionin publik, për këtë arsye ato janë arrestuar dhe ndaj tyre është caktuar nga gjykata masa e sigurisë ‘Arrest në shtëpi’. Rezulton se të dy kanë shpërdoruar detyrën, sepse nuk kanë marrë masa për të parandaluar vrasjen, si dhe kanë dhënë deklarime të rreme, duke dhënë fakte të ndryshme mbi ngjarjen. Ndërkohë, 6 efektivë të tjerë të Forcave ‘Shqiponja’ janë pezulluar nga detyra. Më konkretisht Dedjon Duraku, Pëllumb Bicaku, Erjon Balla, Erjon Meçja, Donald Dedja dhe Besmir Kadiu të cilët po ashtu kanë qenë në vendin e ngjarjes. 

 

Albert Nushi dhe Nikollaq Palla

Ish-drejtori i Përgjithëm të Policisë Ardi Veliu  dhe Prokurori i Elbasanit Alfred Shehu
 

Rendit zhvillimet sipas orarit:
Ora 14:10
Arrestimet për vrasjen e Pjerin Xhuvanit, ‘Rithemelimi’: Nuk bënë drejtësi, por po fshehin ngjarjen

Pas arrestimeve një ditë më parë, për vrasjen e Pjerin Xhuvanit ka reaguar Grupi i Rithemelimit. Përmes një deklarate, deputeti Flamur Noka tha se autoritetet nuk po bëjën drejtësi, por po fshehin ngjarjen.

Sipas Nokës, i pari që duhej të ishte thirrur dhe të mbante përgjegjësi për vrasjen është deputeti socialist Taulant Balla.

“Ngjarja tragjike e prillit të shkuar në Elbasan, ka shënuar dje edhe një viktimë tjetër: Të vërtetën. Në përpjekje për të manipuluar dinamikën e ngjarjes, dhe përfshirjen në të zyrtarëve të lartë, Policia ka bërë dy arrestime të cilat nuk zbulojnë gjë, por fshehin. Nuk bëjnë drejtësi, por e varrosin atë. Arrestimi i dy zv/ drejtorëve dhe pezullimi i 6 policëve, nuk është gjë më shumë se hi syve opininionit publik. Nuk është asgjë më shumë se përpjekja e dytë për të kaluar nga manipulimi fillestar në varrosjen përfundimtare të ngjarjes.

Përgjegjësit e ngjarjes së Elbasanit, si në ngjizje, dhe më pas në shtrembërim të provave, i keni sot, ‘lart e më lart’, në zyrat e shtetit. I keni në personin e ish Drejtorit të Përgjithshëm të Policisë, Ardi Veliu. Sot, ai i ka ikur detyrës së atëhershme, dhe është graduar zv/ministër i Transporteve, por nuk mund t’i shpëtojë përgjegjësisë.

I keni në personin e Alfred Shehut, prokurorit manipulator të provave të ngjarjes që ‘e fluturoi’ me ngritje nga Elbasani në SPAK. I keni në personat e Drejtorit të Policisë së Elbasanit dhe zv Drejtorit të Përgjithshëm të Policisë, të cilët u bënë pjesë e strukturës inkriminuese dhe kriminale të fshehjes së faktit se në makinën e viktimës kishte materiale zgjedhore.

Arrestimi i 2 zv/drejtorëve nuk është punë e strukturave ligjzbatuese, por pasojë e rrëfimit të Niredin Dumanit. Asnjë prej tyre nuk u hetua, prej më shumë se një viti, dhe as do të hetohej kurrë. Nuredin Dumani, një vrasës me pagesë, u kthye në polic, prokuror dhe SPAK të Republikës. Sepse, kur Republika kthehet në kriminale, janë kriminelët që e rrëzojnë atë përmbi kalbjen e saj.

Po të kishim Republikë të ligjit dhe barazisë para tij, i pari që do të ishte thirrur në prokurori do të ishte përgjegjësi kryesor për ngjarjen, Taulant Balla. Këta janë njerëz të rrezikshëm. Shqipëria është në rrezik”, tha Noka.

SI.E./Shqiptarja.com

Ora 13:04
Arrestimi i 2 zv.drejtorëve të policisë, deputeti Boçi: Rama po i shet një nga një për të shpëtuar lëkurën e vet

1656079938_Screenshot1.jpg

Deputeti i PD, Luciano Boçi ka reaguar për arrestimin e 2 zv.drejtorëve të policisë, Albert Nushi dhe Nikollaq Palla duke thënë se është maja e ajsbergut të implikimit të turpshëm të kësaj trupe në masakrën zgjedhore të 25 prillit.

Boci thotë se laku po shtrëngohet për Ramën ndërsa thekson se arrestimi nuk përbën më lajm për të sepse i shet një nga një për të shpëtuar lëkurën e vet.

"Midis tyre spikat Zv/drejtori NUSHI, i përfshirë në manipulim provash dhe në ngjarje të tjera. Zelli i tij ekstrem në goditjen e protestuesve demokratë ka qenë i njohur për publikun. Por tashmë ai e ca të tjerë e kanë përmbushur rolin e tyre, e “mjeshtri” lart, po i shet një e nga një, për të shpëtuar lëkurën e vet. Prandaj arrestimi i tyre nuk përbën më lajm.

Është shitja e rradhës, pasi i ka shtrydhur mirë e mirë. A nuk bëri kështu me Kokën?! Po me Bllakon, pasi e shfrytëzoi si blerës votash?!  Etj…etj… Por megjithatë laku po shtrëngohet pak nga pak dhe për Ramën. Revolta popullore është në prag!" - shkroi Boçi.