‘Art në gur’, edicioni i X-të i simpoziumit të skulpturave! 60 vepra arti kthejnë në ‘muze’ qytetin e Korçës

60 vepra arti  realizuar në gur nga skulptorë vendas dhe të huaj i dhuruan qytetit juglindor të Korçës një muze të vërtete në natyrë këtë qershor.

Abstraktja dhe liria e shpirtit artistik shprehur përmes artit të gdhendjes në gur erdhi këtë herë në edicionin e X të simpoziumit Ndërkombëtar të skulpturave, ku artistë nga Shqipëria dhe vende të ndryshme të botës u bënë bashkë me punimet e tyre në Parkun e Qytetit të Korçës.

‘Është kënaqësi që jam pjesë e këtij simpoziumi. Simpoziumi i Korçës ka rëndësi të veçantë për mua sepse është një ndër aktivitetet e vetme të tilla që organizohen në Shqipëri’.- u shpreh Butrint Morina, skulptor.

LEXO EDHE:
Plagosi 3 ditë më parë djalin e tij, Gjykata e Korçës lë në burg 83-vjeçarin

‘Simpoziumet kërkojnë një intensitet pune. Jam shumë i lumtur që marr pjesë në këtë simpozium me artistë kaq të arrirë. Ne kemi punuar fort për të sjellë këtë punë tonën 8 orë ose 9 orë në ditë. Korça më jep një frymëzim të madh në punën time’- u shpreh Ali Xhebari, skulptor nga Irani.

Për kuratorin Genti Tavanxhi, rëndësia e simpoziumit qëndron në inkurajimin e artistëve të rinj për zhvillimin e kësaj gjinie të artit bashkëkohor, po aq sa në zhvillimin e jetës kulturore të qytetit.

‘Jam shumë i gëzuar për pjesëmarrjen. Skulpturës së parkut nuk i është dhënë asnjëherë mundësia të paraqesë formën e mirëfilltë dhe gjuhën stilistike. Me simpoziumin e Korçës ne i kemi realizuar të gjitha këto gjëra duke sjellë artistë nga e gjithë Bota nga vende të largëta. Ne kemi mundësuar shprehitë artistike, një iniciativë që do të ndihmonte dhe artistë shqiptarë të kalonin nga faza komuniste tek ajo bashkëkohore.’- tha kuratori Gent Tavanxhi.

Parku Rinia në Korçë është kthyer në një vend jo vetëm çlodhës, por edhe turistik për nga numri i madh i skulpturave të instaluara. Simpoziumi Ndërkombëtar i Skulpturës është i vetmi i organizuar në Shqipëri, ndërsa këtë edicion aktiviteti u zhvillua përgjatë dhjetë ditëve, nga data 20 deri më 30 qershor në Korçë.

M.Q./Sh.Sh/Shqiptarja.com

TAG:
• Korce
• butrint morina
• ali xhebari
• Gent Tavanxhi