Assange: Unë jam gazetar, Pentagoni
më urdhëroi të shkatërroja dokumentet

HONG KONG-  Pentagoni ka urdhëruar themeluesin e Wikileaks, Julian Assange, të shkatërrojë të gjithë dokumentet, kabllogramet që disponon- të publikuara ose ende- dhe të ndalojë së përdoruri burimet e qeverisë për të nxjerrë materiale të reja. Deklarata është bërë nga vetë Julian Asange, i cili dje në mbrëmje ishte i pranishëm në një samit mediatik, përmes skype.

“Kur ne publikuam dokumentet tona Pentagoni tha se ne duhej të shkatërronim gjithçka që kishim publikuar ose do të publikonim” ka thënë Assange. “ Dhe nëse nuk donim do të detyroheshim ta bënim”.

Assange bëri këto deklarata nëpërmjet Skype, në samitin NEWS 2011 që u mbajt mbrëmë në Hong Kong të Kinës.

Drejtues dhe pronarë të mediave të mbi 80 vendeve ishin mbledhur aty për të diskutuar mbi principet editoriale, mjetet, si dhe modelet e biznesit në fushën e medias.

Reporterët tregojnë se Asange ishte nën presionin e policëve të cilët e urdhëronin të mos fliste, ndërkohë që të gjithë gazetarët të pranishëm në samit duartrokitnin Assange.
 
I pyetur nga moderator nëse e konsideronte veten një gazetar ai tha “Sigurisht, unë jam një gazetar i inatosur." ( termi i përdorur nga Assange është Goddamned journalist).

Assange cilsoi internetin si makina më e madhe e survejimit që është ndërtuar ndonjëherë dhe “ku cdo informacion i ruajtur në Gmail dhe yahoo është i shikueshëm pë cdo agjenci qeveritare”

Assange po përballet me cështjet e ekstradimit nga Britania e Madhe drejt Suedisë për akuzën e përdhunimit. Avokatët thonë se është një lëvizje që krijon mundësinë që klienti i tij të përballet me akuza në Amerikë për shkak të publikimit të dokumenteve.