Associated Press: Peshkopi i ri serb me qëndrim më të butë ndaj pavarësisë së Kosovës

Kreu i ri i Kishës ortodokse serbe, Porfirije, i kurorëzuar të premten në Beograd, është cilësuar si një prift me qëndrim të më të butë ndaj pavarësisë së Kosovës sesa pararendësi i tij, Irinej i cili vdiq si pasojë e infektimit me COVID-19.  

Porfirije, 59-vjeçar, “besohet se ka një qëndrim më të butë ndaj pavarësisë së Kosovës sesa pararendësi i tij dhe pjesa tjetër e klerit të lartë të kishës serbe”, shkruan agjencia e lajmeve Associated Press.

Sipas AP-së, patriarku i ri i kishës serbe, Porfirije, njihet si njeri i afërt me presidentin serb Aleksandër Vuçiç.

“Ardhja e një aleati në krye të kishës do të jetë me rëndësi për Vuçiç nëse ai përpiqet të negociojë me shumicën shqiptare të Kosovës vendosjen e marrëdhënieve në të ardhmen mes Serbisë dhe Kosovës. Përkrahja nga Kisha serbe, e cila në Kosovë e ka të vendosur selinë historike, konsiderohet të jetë kyçe për çfarëdo marrëveshje”, shkruan AP.

Kisha serbe vazhdimisht e ka kundërshtuar pavarësinë e Kosovës, ndërkohë që AP përkujton se ajo luajti rol kyç edhe në zgjedhjet e Malit të Zi, ku partitë pro-serbe mposhtën pushtetin pro-perëndimor të Milo Gjykanoviç, verën e kaluar.

TAG:
• kosova
• kosova
• kosova
• kosova
• serbia
• Kisha Ortodokse Serbe