Atletico "mace e zezë" për Bayern 
fitojnë PSG dhe Barça, ngec City

Janë luajtur sonte ndeshjet e dyta për grupet A, B, C dhe D të UEFA Champions League. Kryendeshja ka qenë ajo e grupit D mes Atletico Madrid dhe Bayern Munchen e mbyllur me fitoren e vendasve 1:0. Gjermanët dështojnë sërish përballë spanjollëve, duke regjistruar humbjen e dytë radhazi në "Vincente Kalderon".
 
Nënkampionët e Champions League shënuan në portën e bavarezëve në minutën e 35' të takimit me anë të Carrasco, i cili i ndihmuar edhe nga shtylla mposhti Neuer.
 
Të besuarit e Simeones ishin pranë dyfishimit të rezultatit në minutën e 84' të takimit kur Antoine Griezzman humbi një 11-metërsh të fituar po nga ai, pas një faulli në zonë nga Arturo Vidal.
 
Rezultati nuk ndryshon deri në minutat e fundit, me Atletico-n që bëhet "mace e zezë" e gjermanëve të cilët dështojnë dy herë radhazi të dalin me pikë nga fusha spanjolle.
 
Në takimet e tjera kanë triumfuar favoritët, ndërsa surprizë ka qenë barazimi 3:3 i Manchester City-t përballë Selltik në Skoci.  
 
Dueli i vëllezërve Xhaka mbyllet me fitoren e Granitit, pasi Arsenal i tij mposhti lehtësisht Bazelin me rezultatin 2:0. Si Taulanti ashtu edhe Graniti ishin titullarë në këtë takim.  
 
Barcelona arriti të marrë një fitore me përmbysje në Gjermani ndaj Borussia Monchengladbah. Fitore edhe për francezët e PSG të cilët mundën 3:1 bullgarët e Ludogorets Razgrad, në fushën e këtyre të fundit. Ndërsa në Itali, Napoli bind përballë portugezëve të Benfica, duke i mundur 4:2. Napolitanët kryesojnë grupin B me pikë të plota, 6. 


(Rezultatet e ndeshjeve të luajtura sonte)

Redaksia Online
l.q/Shqiptarja.com