Ish Fusha e Aviacionit të Tiranës, po kthehet në një qendër të re artistike për zhvillimin e aktiviteteve të ndryshme sipas një projekti të Bashkisë së Tiranës. Hap i parë është hedhur. Kjo vepër arti, ky avion prej letre i zmadhuar është promovuar në parkun e fushës së aviacionit në mes të pedonales. “Është origrami “Ëndërr Fëmijërie”, që ka për qëllim të ruaj memorien ose kujtesën kolektive të zonës ku është vendosur.

Vepra imiton aeroplanët prej letre, të cilat i bëjnë shpesh fëmijët. Është 11.5 m e gjatë, thuajse sa gjatësia reale e një Avioni Mig që dikur gjendej shpesh në ish Fushën e Aviacionit në kohën e luftës pa paqe.

"Është si një fletë letre që pas disa kohësh mendohet të mbajë mbi shpinë pjesëza letërsie për fëmijë, nga filmat e animuar të para viteve 90-të, personazhe fëmijësh, letërsi etj… Vendosja e kësaj vepre arti në park, e kthen zonën e Ish Fushës së Aviacionit, në një vend ku të rinjtë kanë dëshirë të promovojnë atje librat e tyre, artin, teatrin etj…” thotë autori i projektit Elian Tanini.

[gallery]24307[/gallery]
I pranishëm në promovim ishte edhe kryetari i Bashkisë, Erjon Veliaj.

Kjo vepër është dhuratë për qytetin e Tiranës ku në bashkëpunim me Bashkinë e Tiranës dhe me donatorët përkatës, ky origram i zmadhuar kthehet në një vepër kulti, e cila i kushtohet lojës së fëmijëve, bashkë me ta edhe memories së qytetit.

Tanini thotë se “Vepra është dhuratë për qytetin e Tiranës nga familja e pilotit dëshmor, Bego Hoxha (1943 - 1974) si shenjë e kujtesës kolektive dhe shpirtërore.

E mbështetur nga Bashkia e Tiranës, Kontakt Shpk dhe UTS 01, vepra iu kushtohet atyre që i nisën fluturimet në tokë e u përjetësuan me qiellin. Ajo është edhe një dedikim i veçantë për fëmijët që nuk do të rreshtin kurrë së ëndërruari me aeroplanë prej letre...”

Është një vepër arti në park, e cila i jep Tiranës por edhe kesaj zone një pasuri kulturore por edhe estetike. Shtim në kujtesën urbane një pikë të re referimi: Takohemi tek Raketa, tek Avioni. Vendosja e kësaj vepre parku synon kthimin e hapësirës ku është vendosur vepra me më shumë hapësira natyrale, me bar dhe me dhe.