TIRANE- Azem Bushati, babai i Alma Arrazit (Bushati), e cila më 2 maj 2024, u vetëflijua duke u hedhur në lumin Buna bashkë me 3 fëmijët e saj të mitur, në gjendje të rënduar emocionale ekskluzivisht për emisionin ‘Pa Gjurmë’ në Report Tv thotë se shpesh herë i kishte kërkuar të bijës që të ndahej.

‘Nuk është gjë e vogël të përcjellësh 4 kufoma’- thotë ai, ndërsa i është përgjigjur edhe kunatit të të bijës së ndjerës Edison Arrazit, i cili një ditë më parë tha se në shtëpinë e tyre kishin bërë gati 4 arkivolë, për të varrosur edhe Almën në shtëpinë e tyre. ‘Sa të jem gjallë unë goca ime nuk varroset atje’, betohet Azem Bushati, i cili shtoi se do ta varrosë në Durrës pranë nënës së saj.

Azem Bushati: Nuk është gjë e vogël që të përcjellësh 4 kufoma. Jemi në gjendje nuk e di si ta them, nuk më dalin fjalët. Nuk e kam mendjen. Kunati ka thënë kam blerë 4 arkivole, po goca ime nuk varroset atje sa të jem gjallë unë. Gocën time do ta marr ta varros në Durrës, te nëna e vet. Nuk kemi njeri në Shkodër ne”.

Odeta Dume: Ju kishte treguar që kishte probleme me burrin?

Babai: Patjetër.

Odeta Dume: Pse s’kishit marrë masa që ta largonit vajzën nga ajo familje?

Azem Bushati: I kemi marrë masat, i kemi thënë që çdo ka marrë fund, duhet ta kuptosh diçka të tillë. Lërë dhe eja në shtëpi. Nuk je as e para as e fundit.

Flijimi i Alma Arrazit me tre fëmijët për shkak të dhunës dhe tradhtisë bashkëshortore tronditi opinionin publik. Pas tre ditë kërkimesh janë gjetur trupat e pajetë të të gjithë të mbyturve në Bunë. Gjykata e Shkodrës vendosi të lërë pas hekurave bashkëshortin Erdgys Arrazi, i cili dyshohet si shkaktar i vetëvrasjes.