Balla zbulon detajin e paditur deri më tani nga super-grabitja në Rinas (VIDEO)

Teksa policia nuk ka dhënë ende një informacion zyrtar mbi dinamikën e shkëmbit të zjarrit mes tyre dhe grabitësve në Rinas apo mbi identitetin e tre autorëve të tjerë, në parlament dalin detaje të reja.

Numri dy i socialistëve flet edhe për plagosjen e një tjetër grabitësi, përvec vrasjes së Admir Muratajt. Kreu i grupit parlamentar të Partisë Socialiste Taulant Balla tha se përveç të vrartit gjatë shkëmbimit me policinë, Admir Murataj, policia ka lënë të plagosur edhe një prej grabitësve, i cili së bashku me tre bashkëpunëtorët e tjerë mundën të arratiseshin pas ndjekjes nga policia. 

"Më lejoni që në emër të mazhorancës dua ta falënderoj dhe përgëzoj Policinë e Shtetit për reagimin,  për herë të parë pas kaq shumë vitesh të ngjarjeve të ngjashme,  jo vetëm në kohë por të vënë në një sulm me armë të rënda, Policia e Shtetit ka arritur të asgjesojë njërin prej kriminelëve dhe të ketë plagosur njërin prej tyre. Të jeni të bindur se deri javën e ardhshme, kur kemi dhe interpelancën, rezultatet e punës së Policisë së Shtetit do të jeni të tilla që të paktën të merrni mundimin e të falenderoni për herë të parë punën e Policisë së Shtetit. Sot Kuvendi i Shqipërisë është në ditën për të nxitur Policinë e Shtetit që të godasë me forcë çdo akt të tillë kriminal sikurse ka reaguar dy ditë më parë", tha Balla.

Policia e Shtetit ka dhënë vetëm një informacion paraprak ditën kur ndodhi grabitja, më 9 prill, pa dhënë se sa është vlera monetare e grabitur, që 4 banka të nivelit të dytë në Shqipëri do e transportonin për depozitim në Vienë me avion nga Rinasi. Po ashtu, nuk është saktësuar ende zyrtarisht, nëse Adrmit Murataj u vra nga policia, apo nga vetë bashkëpunëtorët grabitës, siç janë ngritur disa pretendime. 

Më herët gjatë ditës së djeshme, edhe zëvendëskryeministri Erjon Braçe nxorri informacione që policia nuk i ka deklaruar zyrtarisht, duke thënë se të gjithë personat që u përfshinë janë identifikuar dhe po punohet për arrestimin e tyre.

"Prioritet tani kapja e banditeve! Ndaj mbështetje për çdo oficer te policisë te përfshire ne hetime e operacionin e pandërprere ne terren! Pas kësaj, padiskutim analize e plote e çdo elementi qe ka cenuar rende sigurinë nga bankat ne aeroport, masa te forta për çdokënd! Gjithe mbështetjen për Policinë e Shtetit; Burrat qe u përballen dje me  një prej bandave me te rrezikshme ne vend dhe eliminuan drejtuesin e saj; Burrat qe po hetojnë intensivisht dhe qe kane identifikuar çdo bandit te përfshire; Burrat qe janë ne territor e vijojnë ndjekjen" deklaron Braçe.

G.M./Shqiptarja.com

TAG:
• taulant balla
• admir murataj
• grabitje me vdekje ne Rinas