Balotazhi në Kosovë/ Pjesëmarrja 32.5%! LDK fiton 5 komuna, LVV dhe AAK nga 4, PDK 3! Lista Serbe rimerr Kllokotin! Mamusha me minoritet turk zgjedh KDPT

Përparim Rama i LDK-së, kryetari aktual i Prishtinës, ka shpallur fitoren në kryeqytet. Ai falenderoi qytetarët për besimin që i dhanë edhe për një 4 vjeçar tjetër, ndërsa kërkoi bashkëpunim. 

“Unë e kam shprehur edhe më parë. Jam i gatshëm të bashkëpunoj me të gjithë të cilët i bashkohen vizionit transformues. Projekt i madh që e kemi nisur prej 4 vitesh, dhe tani po e vazhdojmë sërish. Falenderoj nga zemra qytetarët për besimin që më dhanë sërish. I ftoj të gjithë që të na bashkohen dhe të bëjmë një asamble të fortë dhe të fuqishme.”, tha ai.

Ndërsa kryetari i LDK-së,  Lumir Abdixhiku tha rezultati në Prishtinë është i rëndësishëm pasi nga kryeqyteti nisin ndryshimet e mëdha. 

“Kemi garuar në 9 komuna, sonte kemi fituar 5. Në raundin e parë kemi fituar 2. Në disa komuna provohet, angazhohet vjen një kohë dhe në mënyrën më demokratike të ndryshojë qeverisja. Kandidatët tanë duhet të ndihen krenarë për angazhimin e bërë. Në përgjithësi LDK ka një rezultat të jashtëzakonshëm në një garë të vështirë. Nisur nga Prishtina, vazhduar në Pejë...pra janë fitore thelbësore të LDK, me të cilat duhet të shohim edhe frymën e ardhshme në politikë. Jemi të lumtur që Prishtina ka folur e para. Në Prishtinë kemi pasur mbështetjen e qytetarëve. Mos harroni një fakt, në Prishtinë LDK dhe Përparim janë të parët. Prishtina ka reflektuar e para. Të dalë LDK e para si parti në Prishtinë, sepse në kryeqytet nisin ndryshime të mëdha edhe në nivel nacional.", tha ai. 

Pas mbylljes së procesit të votimit për balotazhet e zgjedhjeve lokale në 18 komuna në Kosovë, Klan Kosova ka publikuar edhe Exit Poll-in e parë.

Pak pas mbylljes së qendrave të votimit për balotazhet e zgjedhjeve lokale në 18 komuna në Kosovë, kanë dalë edhe projeksionet e para të sondazheve për rezultatet. Sipas rezultateve, Prishtinën e fiton Përparim Rama i LDK-së me 53,62%, ndërsa Hajrullah Çeku i LVV-së që merr 46,38%.

Në Gjilan, triumfon Alban Hyseni i VV-së me 60,40% kundrejt Arbër Ismajli i LDK-së me 39,60%. Në Gjakovë, Ardian Gjini i AAK-së merr 57.20 për qind ndërsa Ardian Gola i VV-së merr 42.80 për qind.

Në Pejë, parashikimet nxjerrin fitues Gazmend Muhaxherin e LDK-së me 57,72 për qind ndërsa kandidati Taulant Kelmendi i VV-së merr 42,28%. Në Mitrovicë balotazhin e fiton Arian Tahiri i PDK-së me 50,34%, ndërsa Faton Peci i Vetëvendosjes 49,66%. Në Fushë Kosovë fiton Valon Prebreza i VV me 53,45% përballë Besnik Osmani së LDK-së me 53,45%. Prizrenin e rimerr Shaqir Totaj i PDK-së me 55.14% përballë kandidatit të VV-së, Artan Abrashi me 44.86%.

Pas exit-pollet e para, nxorrën fitues kryetarin aktual të Komunës së Prishtinës dhe kandidatin e Lidhjes Demokratike të Kosovës, Përparim Ramën në zgjedhjet e pjesshme në Kosovë, selia e LDK-së ka festuar.

Në video shihet se qytetarët bërtasin të gëzuar pasi exit-polli nxori Ramën fitues me 52.8%.

Teksa kanë mbetur edhe një orë nga mbyllja e orarit zyrtar të procesit të votimit për zgjedhjet e pjesshme lokale, KQZ në Kosovë ka publikuar pjesëmarrjen deri në orën 17:00.

Sipas KQZ, pjesëmarrja në votim deri në orën 17:00 është mbi 28%.

Në Prizren, qytetin e dytë më të madh të Kosovës, edhe sot, në raundin e dytë të zgjedhjeve për kryetar komune, Zeke Berisha, 81 vjeç nuk mungoi në qendrën e votimit. Që nga dita kur fitoi të drejtën e votës, ai nuk ka lënë asnjë proçes pa marrë pjesë.

Bashkë me bashkëshorten e tij, Fahrije Berisha, 78 vjeçe, ai u paraqit në qendrën më të madhe të votimit në qytet. Me plis të bardhë mbi kokë, që e mban që në moshën 13-vjeçare, Zeka tha se vota është nder, por edhe obligim moral për secilin qytetar.

‘Votimet e sotme janë si sofra e atyre që janë në Hagë. Kur të kthehen, do ta gjejnë sofrën e gatshme”, thotë ai duke shtuar se shpreson që balotazhin ta fitojë ai që është më i miri.

E njëjtë është edhe historia e Hamdi Morinës, 73- vjeç, i cili ka votuar pa ndërprerje që nga zgjedhjet e para pasluftës. Ai beson se ky raund do të sjellë më shumë stabilitet dhe e sheh të dëmshme që vendi të shkojë sërish në zgjedhje të parakohshme.

“Duhet të zgjedhim njerëzit adekuat që na përfaqësojnë dhe pastaj t’u japim kohë për të punuar”, thotë Morina.

Në këtë raund të dytë, qytetarët e Prizrenit zgjedhin mes Shaqir Totajt të Partisë Demokratike të Kosovës, që kërkon mandatin e dytë, dhe Artan Abrashit të Lëvizjes Vetëvendosje.

Mbi 191 mijë qytetarë kanë të drejtë vote, ndërsa deri në mesditë pjesëmarrja ka qenë më e ulët se në raundin e parë, por zyrtarët e qendrave të votimit presin rritje të fluksit deri në orën 19:00, kur mbyllet procesi.Sinkrone:Kordinatoret e dy qendrave me te medha te votimit.

Pas Prishtinës, gara më e fortë politike zhvillohet pikërisht në Prizren. Megjithëse komuna ka peshë të madhe politike e ekonomike koalicioni lokal mes LDK-së dhe PDK-së, si dhe epërsia e Totajt në raundin e parë, kanë bërë që Vetëvendosje të mos investojë fort në këtë balotazh, duke e fokusuar energjinë në komunat ku ka më shumë gjasa për fitore.

Presidentja e Kosovës, Vjosa Osmani, ka votuar në Prishtinë në balotazhin për kryetarin e kryeqytetit të vendit, nga ku u bëri thirrje qytetarëve të dalin për ta ushtruar të drejtën e tyre për të votuar.

“Shpresoj që secili prej qytetarëve me të drejtë vote do ta shfrytëzojë këtë të drejtë dhe do të dalë në votime. Kosova e ka demokracinë më të fortë elektorale në rajon, dhe kjo është për shkak të pjesëmarrjes së qytetarëve, për shkak të rregullsisë së proceseve zgjedhore dhe për shkak se gjithmonë organizojmë zgjedhje të lira e demokratike”, tha ajo.

Në Kosovë sot po mbahet raundi i dytë i zgjedhjeve vendore për 18 komuna, ndërsa janë shënuar edhe incidente.

Dy persona janë ndaluar nga autoritetet në komunën e Fushë Kosovës, nën dyshimin se kanë dhënë marrë ryshfet në lidhje me votimin, njoftoi Prokuroria Themelore në Prishtinë.

Prokuroria tha se e ka sekuestruar një telefon, “i cili do të shërbejë si provë në procedurën e mëtejme hetimore”.

“Prokuroria Themelore në Prishtinë do të ndërmarrë të gjitha masat dhe veprimet e nevojshme konform dispozitave ligjore për ndriçimin e plotë të rastit”, thuhet në njoftim.

Kushdo që premton, ofron ose jep ndonjë përfitim ose dhuratë të pamerituar ndonjë personi, me qëllim që të ndikojë atë person për të votuar, për të mos votuar, për të votuar në favor apo kundër një personi apo propozimi të caktuar ose për të hedhur një votë të pavlefshme në zgjedhje apo në referendum, dënohet me burgim prej 1 deri në 5 vjet.

Dhënia apo pranimi i ryshfetit në lidhje me votën në zgjedhje në Kosovë dënohet me burgim prej një deri në pesë, sipas Kodit Penal të Kosovës.

Kryetari i Partisë Demokratike të Kosovës, Memli Krasniqi, u bëri thirrje qytetarëve të vendit të dalin dhe të marrin pjesë në balotazhin për kryetarë komunash.

Krasniqi, i cili votoi në Prishtinë, tha se “secili qytetar duhet dhe mund të luajë rol të rëndësishëm për t’u dhënë drejtim komunave ku jetojnë për katër vjetët e ardhshme”.

“Sot në të gjitha komunat ku ka balotazh për kryetar të komunave, unë i ftoj qytetarët që të dalin dhe të marrin pjesë pavarësisht zgjedhjes së parë që kanë bërë. Secili prej tyre mund ta luaj një rol të rëndësishëm për t’i dhënë drejtim komunave ku jetojnë në katër vitet e ardhshme.

Me shpresën që do të kemi një dalje masive dhe substancile që vërtetë do të reflektojë vullnetin e qytetarëve. Uroj që edhe ky proces të shkoj me rregull sikurse rundi i parë. Ditë e mirë për Kosovën, për komunat dhe besoj që përfundimisht do të kemi një përmbyllje të një procesi që i jep drejtim katër viteve të ardhshme”, deklaroi Krasniqi.

Kryetari i Lidhjes Demokratike të Kosovës, Lumir Abdixhiku, e ka kthyer vëmendjen të mundësia e zgjedhjeve të parakohshme parlamentare, teksa votoi në Prishtinë në balotazhin për kryetar të kryeqytetit.

"Nga dita e nesërme do të kthejmë fokusin te zgjedhjet nacionale. Pritjet tashmë janë se në fund të dhjetorit do të kemi festën e ardhshme zgjedhore”, tha ai.

Kosova mund të shkojë në zgjedhje të reja parlamentare në fund të dhjetorin, pasi partitë parlamentare kanë dështuar ta zgjedhin qeverinë e re, pas zgjedhjeve të shkurtit.

Foto: Përparim Rama

Kandidati për kryetar të Prishtinës nga Lidhja Demokratike e Kosovës, Përparim Rama, tha se uron që “të fitojë më i miri" në garën për kryeqytetin në balotazhin e sotëm.

Pasi votoi pak para mesditës, Rama tha gjithashtu se dëshiron t’i falënderojë “të gjithë qytetarët për pjekurinë e maturinë që kanë treguar në këto zgjedhje”.

"Këto zgjedhje janë të rëndësishme nuk definojnë vetëm të ardhmen e kryeqytetit por të ardhmen e gjithë vendit”, tha ai

Mandatari për kryeministër, Glauk Konjufca ka hedhur votën e tij, ndërsa u ka bërë thirrje edhe qytetarëve që të bëjnë të njëjtën gjë.

Ai tha se qytetarët duhet të shfrytëzojnë të drejtën e tyre dhe të bëhen bashkëpjesëmarrës në ndërtimin e demokracisë.

“E kryem këtë obligim qytetar, më vjen mirë që sot është edhe moti i mirë dhe i ftoj të gjithë qytetarët të Kosovës që ta shfrytëzojnë këtë të drejtë të tyre në të gjitha komunat ku po mbahet raundi i balotazhit, ta shfrytëzojnë këtë të drejtë të tyre që të bëhet bashkëpjesëmarrës në ndërtimin e demokracisë. Deri tani, gjithçka ka shkuar mirë, uroj që kështu të përmbyllet ky proces zgjedhor, uroj që të mos kemi asnjë problem, asnjë incident gjatë këtyre zgjedhjeve, e kjo më së miri i bën Kosovës”, u shpreh ai.

Kryeministri në detyrë, Albin Kurti ka ushtruar të drejtën e tij për të votuar në raundin e dytë të zgjedhjeve vendore në Kosovë.

Pas daljes nga qendra e votimit, në një prononcim të shkurtër për mediat, Kurti i bëri thirrje të gjithë qytetarëve për të marrë pjesë në proces.

Kurti tha se fletëvotimi ishte i thjeshtë me dy emra dhe njëri prej tyre bëhet kryetar në mbrëmje.

“Gjithçka do të shkojë mbarë e mirë”, tha kryeministri në pëmbyllje të fjalës së tij.

Vendvotimet në të gjitha komunat në Kosovë ku zhvillohet balotazhi do të jenë të hapura nga ora 7:00 deri në 19:00, sipas Komisionit Zgjedhor të Kosovës.

Procesi zgjedhor do të zhvillohet në 525 qendra të votimit, me gjithsej 1.648 vendvotime, prej të cilave 507 qendra me 1,628 vendvotime për votimin e rregullt.

Ndërsa, për votim me kusht do të jenë 18 qendra, nga një për çdo komunë, me 20 vendvotime, sipas Komisionit Zgjedhor.