LAÇ - Një shkëndijë elektrike u bë shkak që familja e Dodë Gjokës nga lagjja kromit në qytetin e Laçit prej 5 muajsh të jetojnë në një çadër.

Shtëpia e tyre u shkrumbua nga flaket e zjarrit dhe e vetmja ndihmë  për to, ishte kjo çadër e cila ju sigurua nga Bashkia Kurbin. E zonja e shtëpisë, Dila Gjoka thotë se jetesa është mjaft e vështirë në një kohë që temperaturat sa vinë dhe rriten.

"Që në shkurt kur na është djegur shtëpia askush nuk ka vendos dorë mbi ne. Nuk kemi asnjë lloj gjëje, as bukë për të ngrënë nuk kemi. Kjo çadër nuk është as për diell, as për shi. Ne mbaruam këtu. Kur të shkojnë temperaturat mbi 40 gradë se di se si do të rrimë. Kërkoj që të më rregullohet shtëpia sa më shpejt" tha e zonja e shtëpisë, Dila Gjoka.

Të ardhurat për çiftin e bashkëshorteve janë vetëm 30 mijë lek të vjetra në muaj, ndaj dhe apelojnë për ndihmë për rindërtimin e banesës, përpara se të vije dimri, pasi vetë ata nuk kanë asnjë mundësi.

"Me 30 mijë lek ndihmë sociale rrojmë. Se ku ti çojmë ato lekë më përpara se di." shton më pas ajo.

"30 mjë lek marrim, jam pa pension, pa asnjëlloj të ardhure. Jemi në mëshirë të fatit. I kërkoj ndihmë shtetit që të më ndihmojë" tha kryefamiljari, Dodë Gjoka.

Banesa e familjes Gjoka në qytetin e Laçit u shkrumbua nga flakët e zjarrit në muajin shkurt të këtij viti. Dëmet e shkaktuara janë verifikuar nga emergjencat civile por deri më tani çiftit të moshuar nuk ju ka ardhur askush në ndihmë.