Barcelona e pranon: Neymar
te PSG, përshëndeti shokët

Zyrtarizimi i kalimit të brazilianit Neymar tek PSG është Vetëm çështje orësh. Mëngjesin e sotëm ka pasur zhvillime të rëndësishme që thuajse kanë shuar dilemat për të ardhmen e sulmuesit.

Barcelona ka komunikuar se Neymar nuk është stërvitur por ka përshëndetur të gjithë shokët e skuadrës dhe stafin drejtues dhe u ka thënë atyre se po largohet nga klubi katalanas dhe do të transferohet tek PSG-ja.

Klubi blaugrana pranon me keqardhje këtë situatë dhe sqaron se edhe trajneri Valverde i ka dhënë leje futbollistit që të zgjidhë të ardhmen e tij.

Të gjitha këto janë shenja se Barcelona është e dorëzuar përballë milionave të skuadrës franceze dhe dëshirës së brazilianit.

Neymar do të kalojë tek skuadra franceze për shumën rekord të 222 mln eurove që është edhe shifra e prishjes së klauzolës duke u bërë transferimi më i shtrenjtë në histori.

Një prej agjentëve të besuar të sulmuesit ndodhet në Paris për të mbyllur detajet e kontratës.

Barcelona duket se ka shigjetuar një tjetër Brazilian për të zëvendësuar Neymar dhe ai është Kutinjo i Liverpoolit.

Redaksia Online
l.q/Shqiptarja.com