Bardhi i përgjigjet kryeministrit: E vetmja pengesë për integrimin e Shqipërisë! Duhet mbyllur kapitulli me Ramën për të hyrë në BE!

Kreu i grupit parlamentar të PD-së Gazment Bardhi ka reaguar në rrjetet sociale pas podcast-it të kryeminstrit Edi Rama, ku në shënimet e javës u përqendrua tek integrimi i Shqipërisë në BE. “Asgjë s’e ndal Shqipërinë europiane”, u shpreh Rama ndërsa tha se opozita gëzohej e digjte vendin ndërsa trumbetonte bllokimin e procesit.

Bardhi shprehet se raporti i vendeve anëtare përsërit shqetësimet për mbrojtjen e Belinda Ballukut.

“Ka vetëm një gjë që e ndal Shqipërinë europiane.

LEXO EDHE:
Vendet anëtare të BE-së i hapën rrugë fazës së re të negociatave për anëtarësimin, Rama: Me Konferencën Ndërqeveritare të martën, nis përmbyllja e kapitujve

Quhet Edi Rama.

Për të mbyllur negociatat e anëtarësimit vetëm për Grupkapitullin e Themeloreve, BE-ja i vendosi Shqipërisë 34 kushte të rënda. Sepse Edi Rama mbrojti me votë në Parlament korrupsionin dhe i siguroi Belinda Ballukut imunitet nga arrestimi i SPAK-ut.

Në 34 kushtet për Shqipërinë, Bashkimi Europian shpreh zyrtarisht keqardhje për vendimin e Parlamentit në mbrojtje të Belinda Ballukut dhe i kërkon Kuvendit të zbatojë standardet europiane për imunitetin”, shprehet Bardhi.

Kreu i grupit parlamentar të PD-së flet për raportin e miratuar nga vendet anëtare duke u shprehur se gjuha që është përdorur e ka rënduar pozicionin negociues të Shqipërisë pasi korrupsioni ishte shqetësimi vendimtar i unionit. Sipas Bardhit, negociatat s’mund të mbyllen nëse nuk ndodh më parë mbyllja e “kapitullit të Edi Ramës.”

“Me një gjuhë të papërdorur më parë për Shqipërinë, BE-ja e quan korrupsionin “shqetësim vendimtar”, duke e rënduar pozicionin negociues të Shqipërisë.

Për herë të parë në një raport zyrtar publik, BE-ja identifikon sektorin e ndërtimit si kanal pastrimi parash përmes “transaksioneve jofinanciare” dhe e lidh këtë drejtpërdrejt me korrupsionin.

Për herë të parë në një dokument zyrtar negociues, BE-ja identifikon si problem për zgjedhjet rrjetet e patronazhimit: sistemin me të cilin PS kontrollon votën përmes administratës shtetërore.

Për herë të parë, BE-ja kërkon zgjedhje plotësisht në përputhje me standardet e OSBE/ODIHR-it si kusht zyrtar për mbylljen e negociatave. Sepse zgjedhjet e Edi Ramës nuk kanë qenë kurrë të tilla.

BE-ja kërkon “mbikëqyrje efektive dhe të papenguar parlamentare, përfshirë komisionet hetimore”; një të drejtë që Rama ia ka mohuar sistematikisht opozitës.

BE-ja kërkon edhe zbatimin e vendimeve të Gjykatës Kushtetuese, që Rama i ka injoruar, vonuar ose nuk i ka zbatuar fare.

Grupkapitulli i Themeloreve hapet i pari dhe mbyllet i fundit.

Por pa mbyllur kapitullin e Edi Ramës, Shqipëria nuk i mbyll dot negociatat”, përmbyll Bardhi.

P.J/Shqiptarja.com

TAG:
• edi rama
• gazment bardhi
• integrimi ne be