“Propozimi ynë ka qenë ky që të gjitha gjobat e Tiranës të unifikohen në gjoba të maksimumit që lejon ligji, ai që u votua në mazhorancën tuaj në 2010-ën. Dhe ajo që kemi bërë është që të gjitha gjobat i kemi çuar në nivelin maksimal. Pse i bëjmë ne këto? Për 1% të qytetarëve që i dëmton, edhe t’i paguajë. Deri më sot kjo bashki ka funksionuar me të tjera rregulla, 1% bën pis, 99% paguan. Dikush ndërton pa leje, 99% të tjerët paguajnë”,- tha Veliaj.
Çështja e gjobave u kthye në një mollë sherri mes mazhorancës dhe opozitës në Këshillin Bashkiak. Përfaqësuesit e opozitës kërkonin që ky projektvendim të mos kalonte për miratim për shkak se më herët nuk ishte miratuar nga komisioni juridik i bashkisë. Debati shkoi deri në akuza personale, ndërsa Veliaj u ka kujtuar këshilltarëve të opozitës se nuk përdor më makinën e Bashës, të cilin sipas tij, ja ka dhuruar ish-kreut të bashkisë.
“Nuk e kam Benzin luksoz që kishte Basha, kam marrë një makinë hibride. E kam kthyer Benzin e Lulzim Bashës, ta marri ta gëzojë. Ia kam dhuruar atij personalisht. Shkuam nga Benzi 200 mijë euro në makinë hibride”, -përmendi kryebashkiaku Veliaj.
Projektvendimi për gjobat është miratuar me të gjitha votat e mazhorancës, ndërsa opozita ka kundërshtuar ashpër këto masa që pritet të zbatohen në Tiranë.
Pallatet
Projektvendimi për kalimin e digës së Liqenit në varësi të Ujësjellës-Kanalizime ka sjellë një tjetër debat në këshillit. Opozita u kujtoi Veliajt se “po rimerr digën që ish-kryebashkiaku Edi Rama, sot Kryeministër, përmbyti një lagje të tërë”. Ndërsa Kreu i Bashkisë u tha këshilltarëve të majtë se ata nuk e kanë hallin tek diga, por tek pallatet që Partia Demokratike do të ndërtojë tek Liqeni. “Ju mbroni pallatet e Partisë Demokratike. Administrata e kaluar do të mbahet mend, pasi dha lejë ndërtimi tek Liqeni. Ne do të ndërhymë tek ajo zonë për ta mirëmbajtur pasi siç dihet, digat kërkojnë një kujdes të veçantë” – u shpreh veliaj.
Uji
Kryebashkiaku bëri të ditur se dje Bashkia e Tiranës ka qënë pa ujë, si dhe disa lagje të tjera për shkak të keqmenaxhimit nga ish-administrata. Sipas tij do të ndërhyet pasi rreth 70% e ujit humbet. Veliaj tha se vetëm në tubacionet e Kamzës humbet 35% e ujit që duhet të vinte në Tiranë.
“Ujësjellës Kanalizime Tiranë është në një situatë alarmante, pasi nuk është e aftë që të funksionojë duke sjellë për pasojë mungesën e ujit për shumë lagje në Tiranë. Sot(dje), godina e Bashkisë së Tiranës nuk furnizohet me ujë, por edhe Yzberishti, Rruga e Elbasanit dhe shumë lagje të tjera. Ujësjellësi është i paaftë që të bëjë detyrën e tij, prandaj dua t’i dal garant me 4 njerëz që janë më të aftë se financieri i PD. Pas çdo faturisti të UKT është një deputet i PD, ndërsa rrjeti i ujësjellësit është degraduar plotësisht”- theksoi kryebashkiaku.
Gjatë mbledhjes së djeshme, Këshilli Bashkiak miratoi vendimi për shpërndarjen e pagesës për personat me aftësi të kufizuara, dhe vendimin për caktimin Kryetarit të Bashkisë së Tiranës për të përfaqësuar në mbledhjet e Asamblesë së Përgjithshme të shoqërisë sh.a “Ujësjellës Kanalizime” Tiranë.
Shkrimi u botua në Shqiptarja.com (print) në 4 Shtator 2015
Redaksia Online
(d.a/shqiptarja.com)