Izraeli ka krijuar një bazë sekrete në shkretëtirën irakiane, një postë e avancuar e përdorur në fillim të ofensivës kundër Iranit. Këtë e zbulon The Wall Street Journal në një artikull ku tregohet se vendndodhja u zbulua pothuajse menjëherë pas një sinjalizimi nga barinjtë e zonës. Në ditët e para të marsit, në përkim me nisjen e krizës, disa civilë njoftuan autoritetet irakiane për praninë e pazakontë të helikopterëve në një zonë të largët.

Ushtria dërgoi një njësi zbulimi, por ajo u godit nga një sulm ajror. Përplasja u pasua nga një protestë zyrtare e Bagdadit në OKB: në atë kohë, fajësoheshin Shtetet e Bashkuara, pasi mendohej se bëhej fjalë për ushtarakë të Pentagonit. Por nuk ishte kështu. Në fakt, ishin izraelitë. Sipas burimeve të WSJ-së, IDF-ja kishte ngritur postën mbi një pistë gjysmë të përgatitur. Ajo do të shërbente si mbështetje për operacionet e shpëtimit në rast se ndonjë pilot do të rrëzohej në territorin iranian dhe, me shumë gjasë, edhe për inkursione të komandove përtej vijave armike. Përveç helikopterëve, në zonë ndodheshin edhe pjesëtarë të forcave speciale. Gjurmë të kalimit të tyre do të ishin zbuluar më pas nga një kontroll i kryer nga antiterrorizmi irakian.

Llogaria @obretix në X pretendon se ka gjeolokalizuar instalimin në një pikë rreth 180 kilometra në jug të Najafit, në Irakun jugor. Një fotografi satelitore tregon një “shirit” të përdorur si pistë.

Megjithatë, nuk është e qartë nëse baza vazhdon ende të funksionojë: sipas burimeve lokale mund të jetë braktisur, ndërsa të tjera pohojnë se prej kohësh ishin vënë re lëvizje të dyshimta në atë sektor. Bëhet fjalë për një zonë pak të banuar, ideale për t’u shndërruar në trampolinë për aktivitete “të fshehta” dhe në një distancë të përshtatshme për të mbështetur inkursione brenda Republikës Islamike. Zyrtarë të lartë të IDF-së kanë lënë të kuptohet javët e fundit për përfshirjen e forcave speciale në konflikt, të njëjtën gjë ka bërë edhe Mossad.

Pranime që janë pjesë e luftës propagandistike dhe mjete presioni ndaj regjimit, por edhe një pasqyrim i asaj që kishte ndodhur realisht. Teherani, në fakt, ka dyshuar shpesh se izraelitët kanë shfrytëzuar vendet fqinje për të ushqyer fushatën ushtarake. Zbulimi i depozitave të karburantit për avionë luftarakë në Detin Kaspik hodhi hije dyshimi mbi Azerbaijan, ndërsa gjithmonë ka mbetur i hapur fronti i Kurdistanit irakian, i konsideruar nga ajatollahët si një bazë mbështetëse për inteligjencën armike.

Madje, pasdaranët kanë goditur masivisht pozicionet e rebelëve kurdë dhe qendra të dyshuara spiunazhi. Së fundi, The Wall Street Journal saktëson se baza nuk ka pasur asnjë rol në shpëtimin e dy pilotëve amerikanë të avionëve F-15 të rrëzuar në Iran, pasi ata u nxorën të sigurt nga një operacion ekskluzivisht amerikan, edhe pse në ato orë izraelitët mund të kenë furnizuar me të dhëna inteligjence./ Corriere della Serra