BEOGRAD - Parada gay solli kritika nga Bashkimi Evropian për Serbinë. Përkundër faktit që u anulua, megjithatë aktivistët dolën në orën 23:00 për të shprehur pakënaqësinë e tyre dhe në një shëtitje, nga Qeveria e deri tek Kuvendi serb, thanë se nuk do të heqin dorë nga kërkesat e tyre.

“Duam të tregojmë që ne do të shëtisim, nuk do të zhdukemi dhe do të kemi paradë 365 ditë të vitit dhe deri atëherë kur institucionet të mos e kuptojnë mesazhin dhe thelbin e asaj për të cilën ne flasim këtu”, deklaroi Maja Miçiq nga Nisma e të Rinjve për të Drejtat e Njeriut.

Qeveria e Serbisë, përkatësisht institucionet e sigurisë ndaluan paradën e së shtunës, e cila solli shumë forca sigurie dhe pakënaqësi pasi ndalohet për herë të tretë.

Në procesin integrues Serbia duhet të respektojë të drejtat e njeriut, por kundër paradës ishin organizatat ekstremiste dhe Kisha. Një ditë pas vendimit, ministra të vendeve perëndimore kritikuan Serbinë. Ndërkaq, Jellko Kacin, raportuesi i BE-së për Serbinë, tha se ky shtet nuk po e kryen detyrën.

“Konsensusi është arritur kundër dhe jo pro paradës dhe promovimit të të drejtave të pakicave. Porosia që i është dërguar qeverive të vendeve të Bashkimit Evropian është se shteti serb nuk është duke kryer punën e tij”, deklaroi Kacin.

Redaksia Online
(mag/shqiptarja.com)