Protestuesit refuzojnë për herë të tretë PD-në: Duan të na vjedhin protestën si në ’90! Përplasje fizike, thirrja ‘Berisha në burg’ irriton demokratët (VIDEO)

Pas përplasjeve me protestuesit, deputetët dhe militantët e Partisë Demokratike janë zhvendosur më në hyrje të “Rrugës së Durrësit”.

Ata janë ndarë në grupe të vogla, ndërsa mes tyre shihen edhe Flamur Noka e Klevis Balliu.

Protestuesit refuzuan sërish militantët e Sali Berishës në protestën para Ministrisë së Arsimit. Një demokrate, Xhulia Xhekaj u përball me disa protestuese, të cilat e pyetën se përse e dëmton kaq shumë fraza “Berisha në burg”, e cila sot irritoi demokratët dhe çoi deri në përplasje fizike në protestë.

Xhekaj u kërkoi protestuesve të bashkoheshin për flamurin dhe tha se largimi i Ramës ishte ajo që kërkonte.

Protestuesit këmbëngulën se bashkimi i vetëm është “Rama në burg, Berisha në burg”. U desh ndërhyrja e një djali për të “ulur gjakrat” dhe për të shuar sherrin.

Pjesë nga debati në protestë

Xhulia Xhekaj, demokrate: Unë dua që unë dhe ti të bashkohemi dhe të ecim para.

Qytetarja: Unë s’po shaj PD-në.

Xhulia Xhekaj: Ai është bashkimi. Votoni kë të doni ju.

Qytetarja: “Rama në burg, Berisha në burg”, i vetmi bashkim. Po manipuloni. Fjala “Berisha në burg”, pse të dëmton kaq shumë?

Xhulia Xhekaj: Do më shërosh ti mua? Mua më shëron të ikë Rama. Do të më shërosh? Ec para. Zgjedhje të lira dhe të ndershme, shko voto në kutinë e votimit.

Qytetarja: “Rama në burg, Berisha në burg” është i vetmi bashkim. Mos përçani, këtë po bëni.

Xhulia Xhekaj: Flamuri kombëtar nuk është përçarje.

Turma në kor: Dorëheqje

Xhulia Xhekaj: Bëhuni bashkë për flamurin dhe ecni para. Një flamur është. S’ka flamur ’97. Policia ka gjithë këtë kohë që të dhunon dhe ti zihesh me mua. Po pse, moj, unë jam armiku yt?

Qytetarja: Po na përçan. Unë pse jam armiku yt?

Xhulia Xhekaj: Unë po të ftoj ty, bashkohu për flamurin dhe ec para. Nuk të konsideroj armik, nuk duhet të zihemi. Mund ta zgjidhni një djalë dhe të na udhëheqë para.

Qytetarja: Po ec, moj zonjë, kush po të ndalon?

Një djalë ndërhyn: I keni kamerat te ju dhe ju kapin ju, dhe thonë shqiptarët “ra protesta”. S’ka flamur fare. Lërini këto budallallëqe, largohuni dhe mos hapni më konflikte.

Protestuesit flamingo kanë vendosur një pankartë te Ministria e Arsimit ku shkruhet “RnB BnB”, një shkurtim për thirrjen e tyre “Rama në burg, Berisha në burg”.

Këtë të fundit dëgjohet teksa e thërrasin në kor, duke shtuar edhe “poshtë komunizmi”.

Këto thirrje kanë pasuar edhe përplasjen me militantët e Sali Berishës, të cilët më herët sulmuan fizikisht një protestues.

Një qytetar u përplas me militantët demokratë te Ministria e Arsimit, pasi thirri “Rama në burg, Berisha në burg”. Përplasja zgjati disa minuta dhe një prej tyre e goditi edhe fizikisht.

Gjatë debatit, një person e pyeti qytetarin nëse kishte marrë para për të ardhur në protestë.

“Asnjë lek. Nuk jam me asnjë parti, kam votuar PD-në”, u përgjigj ai, por thirrja “Berisha në burg” irritoi një demokrat. Ai e sulmoi fizikisht qytetarin në fjalë, i cili në rrjetet sociale identifikohet si “Bonat Bonati”.

“Jo Berisha, vetëm Rama”, thotë militanti demokrat, ndërsa shëpërthen edhe në ofendime ndaj qytetarit pasi e goditi.

Qytetari iu përgjigj shkurt: “Të dy”. Pas përplasjes, qytetari tha se kishte mbështetur PD-në deri në vitin 2025 dhe se nuk kishte qenë kurrë anëtar i ndonjë partie.

“Të gjithë në burg, se të gjithë na kanë vjedhur”, tha ai.

Dy persona që ishin parë edhe në protestat e “Flamingove” ndërhynë për të qetësuar situatën dhe e shoqëruan qytetarin jashtë turmës.

Report Tv sjell pamjet me dron nga protesta te Ministria e Arsimit, pasi studentët refuzuan bashkimin me militantët demokratë dhe pati disa përplasje deri edhe në fizike.

Tensione janë shënuar te protesta para Ministrisë së Arsimit, pas ardhjes së militantëve të PD-së.

"Nuk përfaqësoni studentët", tha një protestues.

“Arresto Berishën”, “Berisha në burg, Rama në burg” dhe “Poshtë komunistët” ishin disa nga thirrjet me të cilat protestuesit pritën militantët e PD-së para Ministrisë së Arsimit. Ata refuzuan sërish të bashkoheshin me demokratët dhe u kërkuan të largoheshin me thirrjet “Ik, ik, ik!”. Mes thirrjeve u dëgjuan edhe “Poshtë sekretari i partisë”, “Shqipëria e shqiptarëve” dhe “Vdekje tradhtarëve”.

Në përplasjen me demokratët, disa protestues akuzuan PD-në se po përpiqej t’ua merrte protestën. “Këta duan të rrëmbejnë protestën si në ’90. Ne jemi kundër klasës së vjetër politike, Ramës dhe Berishës”, tha një protestues, i cili më pas u shty nga militantët e PD.

Ai tha se kundërshtimin e kanë me deputetët e PD-së dhe jo me demokratët.

Militantët e PD-së mbërritën para Ministrisë së Arsimit me një pankartë ku shkruhej “Bashkimi bën fuqinë”. Mesazh ky pasi studentët refuzuan demokratët në protestën e tyre.

Ish-truproja i Sali Berishës, Sali Lushaj nuk i “rezistoi dialogut”. Mes protestës, ai u fotografua i ulur te sofra që kryeministri Edi Rama ka vendosur para Kryeministrisë për të ftuar studentët në dialog. Studentët e kanë refuzuar deri tani ftesën, duke kërkuar plotësimin e kërkesave të tyre.

Taulant Balla e komentoi foton me ironi. “Një grup ‘studentësh’ në nivelin master, dega ‘dhunë kundër institucioneve’”, shkroi ai.

Pas një ore qëndrimi në bulevard, militantët e PD-së nisën marshimin drejt Ministrisë së Arsimit, ku janë mbledhur një grup studentësh në protestë. Në dy tubimet e mëparshme, të rinjtë kanë refuzuar praninë e demokratëve. 

Në protestën e PD-së para Kryeministrisë u shfaqën dy pankarta kundër Edi Ramës. Në të parën, me mbishkrimin “Fundi i diktatorëve = Liri”, renditen emrat e Sadam Huseinit, Muamar Gadafit dhe Bashar al-Asadit.

Emri i kryeministrit është vendosur në fund të listës, pranë një laku të vizatuar, me shënimin “Rama E. – Oct. 2026”. Krahas emrave të tjerë janë shënuar dhjetori 2006, kur u ekzekutua Huseini, tetori 2011, kur u vra Gadafi, dhe dhjetori 2024, kur ra regjimi i Asadit.

Në pankartën e dytë është vizatuar Benito Musolini i varur me kokë poshtë. Në të janë shkruar edhe emri i sheshit “Piazzale Loreto” në Milano dhe data 29 prill 1945.

Një thirrje e një protestuesi, “Rama në burg, Berisha në burg”, ka sjellë përplasje fizike në protestën e thirur nga Sali Berisha. Një grup militantësh të PD-së, të irrituar, kanë reaguar dhe njëri prej tyre ka arritur deri aty sa e qëlloi protestuesin me shpullë në kokë.

Ndërkohë, PD-ja e konsideroi si një provokator të qeverisë.

“Një provokator i qeverisë, që e sjell policia. Xhepistë të vegjël që i marrin nëpër komisariate, i sjellin për të sharë qytetarët që vijnë në protestë. Këto janë provokime. Polici kriminale që dhunon studentët dhe sjell këtë lloj llumi dhe zhuli për të sharë me fjalë të ndyra dy zonja. Qytetarët bëjnë shumë mirë që reagojnë kur shahen zonja dhe të rinj e të reja”, tha Balliu për sherrin.

Sekretari i Përgjithshëm i Partisë së Lirisë, Tedi Blushi në një intervistë për Report Tv, tha se ata nuk kanë një axhendë të mirëfilltë për protestë. Ai theksoi se ata do të vijojnë mbështetjen e studentëve që kërkojnë largimin e kryeministrit Edi Rama.

Sa i përket deklaratës së Berishës në lidhje me bashkëpunimin e forcave opozitare si një e vetme në vendoret e 2027-ës, Blushi theksoi se ky bashkim është i domosdoshëm për rrëzimin e kreut të qeverisë.

"Kjo është një protestë që duhet të mbështetet nga të gjithë. Mos prisni të keni një axhendë për protestën, por ne do të vijojmë mbështetjen e studentëve që kërkojnë dorëheqjen e Ramës. I bëj thirrje çdo shqiptari që t’i bashkohet kësaj revolte.

Qëndrimi i PL dhe Metës, është bashkim i çdo faktori. E vetmja pikë e kuqe është largimi i Edi Ramës. Është i domsodoshëm bashkimi i çdo force në zgjedhjet vendore”, tha Blushi.

Deputetët demokratë shihen teksa përdorin celularët gjatë gjithë protestës para Kryeministrisë. Flamur Noka, Edi Paloka, Gazment Bardhi, por edhe përfaqësues të tjerë të PD-së, si Nikola Kedhi, dallohen me celularë në duar mes militantëve.

Protesta e Sali Berishës ishte paralajmëruar për në orën 12:00, por militantët e nisën marshimin drejt Kryeministrisë me gati një orë vonesë. Ndërkohë, para Kryeministrisë nisën të mblidheshin edhe protestues të tjerë. Marshimi u udhëhoq nga Flamur Noka dhe përfaqësues të tjerë të PD-së, ndërsa kreu i partisë, Sali Berisha, mungoi.

Militantët e parë demokratë kanë nisur të mblidhen në selinë e PD-së për protestën e thirrur nga Sali Berisha. Ky i fundit, njëjtë si në dy protestat e kaluara, nuk do t’i bashkohet protestës. Te kryeministria ndërkohë, ende është qetësi.