Berisha shpërblen Gazment Bardhin, e bën nënkryetar! Ndryshimet miratohen të martën, a do pranojë Jorida Tabaku të futet në kryesinë e Rithemelimit?

Pas bashkimit me grupin e Rithemelimit, Gazment Bardhi duket se ka marrë ‘shpërblimin’ nga Sali Berisha, në arrest shtëpie për aferën 'Partizani'. Të martën e 5 marsit do të mblidhet Këshilli Kombëtar i Rithemelimit, ku anëtarët pritet të miratojnë disa ndryshime statutore të cilat do t’i hapin rrugë ndryshimeve në strukturat e partisë.

Gazetarja e Report Tv, Danjela Maloku mëson se Gazment Bardhi dhe Agron Gjekmarkaj do të bëhen nënkryetarë të Rithemelimit, krahas dy nënkryetarëve të tjerë Luçiano Boçit dhe Oerd Bylykbashit. Sipas ndryshimeve që pritet të miratohen, kreu i grupit parlamentar, Bardhi, merr njëkohësisht edhe funksionin e nënkryetarit.

Po ashtu të njëjtin rol do e marrë edhe Gjekmarkaj për shkak të funksionit si nënkryetar i Kuvendit. Me miratimin e këtyre ndryshimeve, Bardhi pritet të marrë edhe një zyrë në selinë e Rithemelimit. 

Kjo lëvizje e Rithemelimit do të afrojë edhe të tjera figura të grupit Bardhi. Të njëjtat burime bëjnë me dije se do të ndryshojë edhe përbërja e kryesisë së Rithemelimit. Me rëndësi është emri i Jorida Tabakut, e cila pritet që të bëhet pjesë e Kryesisë, si kryetarja e Komisionit Parlamentar te Integrimit.

Mbetet për t’u parë nëse Tabaku do të pranojë të rreshtohet krah Rithemelimit, pasi ajo ka mbajtur një distancë me këtë grup që kur iu afruan përfaqësuesit e Bardhit. Madje ajo nuk ka marrë pjesë as në mbledhjet që janë zhvilluar në selinë e Rithemelimit.

Pjesë e Kryesisë së Rithemelimit pritet të bëhen gjithashtu edhe deputeti Ervin Salinaji si zv.kryetar i grupit parlamentar, por edhe Zheni Gjergji si kryetare e Komisionit të Shëndetësisë.

SI.E./Shqiptarja.com

TAG:
• Zheni Gjergji
• Jorida Tabaku
• sali berisha
• gazment bardhi
• Rithemelimi