Duke komentuar situatën politike në vend, Besim Ndregjoni, Presidenti i Unionit të ish të Burgosurve dhe Përndjekurve Politikë të Shqipërisë, e vë theksin tek krimet e padënuara të komunizmit. Ndregjoni shprehet se krimet e diktaturës duhet të shërbenin si reflektim për të parandaluar përsëritjen e fenomenit të krimit sot.

“Dënimin e kemi me komunizmin, nuk e kishim në aspektin e dënimit të individit, por në aspektin e dënimit të krimit që i kishte sjellë fatkeqësi këtij kombi. Përsëritet krimi në rrugë të ndryshe dhe në forma të ndryshme, siç po përdoret tani çështja e krimit të drogës, e krimit të rrugës, e krimit që ka pushtuar dhe po anatemon qetësinë dhe zhvillimin e këtij vendi"-thotë Besim Ndregjoni.

I pytur për dëmshpërblimet e ish të përndjekurve politik, Ndregjoni shprehet dëmshpërblimi është një e drejtë ligjore, por që është përdorur politikisht nga pushtetet.

“Nuk ke pse me bo ndarje klasash tek të përndjekurit politik.Dëmshpërblimin e quaj një manovër të poshtër politike, që përdoret për politikë dhe aspak që të integrojnë të përndjekurit politik"- tregon pë Report TV,  Presidenti i Unionit të ish të Burgosurve dhe Përndjekurve Politikë të Shqipërisë, Besim Ndregjoni.

Besim Ndregjoni u shpreh se qytetarët shqiptarë duhet të zhvillojnë protesta për  ngritur zërin ndaj padrejtësive politike dhe shoqërore.

Redaksia Online
N.M/Shqiptarja.com