POP 5

Lajmet më të lexuara të 5 minutave të fundit

Politikë

Beslidhja e Lezhës, ceremonia
u bojkotua dhe nga ambasadorët

Përvjetori i besëlidhjes së Lezhës ka sjellë përplasjen e institucioneve shqiptare dhe kjo ditë në vend të bashkimit ka sjellë përçarje, teksa Presidentit i është mohuar fjala në ceremoni, duke sjellë refuzimin e pjesmarrjes së tij. Ndërkohë që s'kanë qënë as kreu i opozitës e as ish-presidentët. ( ne foto Berisha dje ne aktivitetin festiv ne Lezhe, me rastin e 568 vjetorit te Beslidhjes)
Beslidhja e Lezhës, ceremonia<br />u bojkotua dhe nga ambasadorët
TIRANE- Përvjetori i Besëlidhjes së Lezhës, këtij simboli të bashkimit të shqiptarëve që i ka mbijetuar 568 viteve dhe ka shërbyer si një udhëzues nga heroi ynë Kombëtar Gjergj Kastriot Skënderbeu për të gjithë shqiptarët në rrugën drejt lirisë, dje ka humbur tërësisht vlerën. Egoja politike, sherri dhe përplasjet ndërinstitucionale mes Kryeministrit e Presidentit ka bërë që jo vetëm të shkelet protokolli i shtetit por dhe të arrijë në përmasat e një skandali përplasja institucionale e politike në vend, e ilustruar aq mirë nga Parlamenti Evropian teksa refuzon Shqipërinë, duke e cilësuar se politika e saj është përfshirë në sherrnajë. Dhe këtë radhë nuk është Edi Rama kreu i opozitës ai që ka "faj" si gjithnjë, pavarësisht se duhej që për hir të kësaj dite të ishte në këtë ceremoni, por janë përfaqësues institucionalë të së djathtës, pikërisht kryetari i PD, kryeministri Berisha e ish-nënkryetari i PD, Presidenti Topi. Sipas presidencës, kryeministri ka ndikuar në ndryshimin e protokollit të ceremonisë, duke i mohuar të drejtën e mbajtjes së fjalimit në tubimin festiv. Por Bashkia e Lezhës thotë se presidenti do fliste po të kishte ardhur. Tusha thotë se Topi s'konfirmoi pjesëmarrjen në ceremoni e në protokoll ishte parashikuar që presidenti do mbante një fjalim. "Është e pakuptimtë mospjesëmarrja e presidentit. 568 vjet më parë Skënderbeu bashkoi princat, klasa politike nuk gjen kurajon për tu bashkuar", tha kryebashkiaku i Lezhës. Por, në programin e ceremonive përkujtimore për 568-vjetorin e Kuvendit të Lezhës, parashikohet me detaje deri numri i valltarëve apo veshjet e tyre, madje dhe numri i "Trimave", emrat e valltarëve, numri i lodërtarëve, nga hyn kryeministri dhe gjithçka në mënyrë të detajuar, vetëm vajtja e presidentit Topi nuk figuron askund. Në programin e përpiluar nga Protokolli i shtetit, me të cilin është njohur Topi, duke konfirmuar dhe pjesmarrjen, parashikohet se në ceremoni do përshëndesnin Kryetari i Bashkisë së Lezhës, Presidenti dhe kryeministri. Por, Topi, që i kishte konfirmuar Protokollit të Shtetit praninë e tij të enjten, dje s'mori pjesë në aktivitet. Presidenca në mënyrë zyrtare e sqaron saktë dhe me detaje këtë kthesë 24 orëshe që e nxori jashtë loje kreun e shtetit në përvjetorin e Beslidhjes së Lezhës. Sipas sqarimit të Presidencës, "Presidentit iu mohua e drejta e përshëndetjes në aktivitet. Kjo iu bë me dije kabinetit të presidentit të premten, në prag të vetë ceremonisë. Drejtori i Protokollit të Shtetit në MPJ i komunikoi kabinetit të Presidentit se në takim do mbante një fjalë përshëndetëse vetëm kryeministri. Kjo konfirmohet nga një program i dytë, i quajtur Axhenda e Besëlidhjes, shpërndarë nga Bashkia e Lezhës si organizatore e aktivitetit. Në këtë axhendë të re shkruhet se pas përshëndetjes së kryetarit të bashkisë, ky i fundit fton kryeministrin për fjalën e rastit". Këtë akt, Presidenca e konsideroi përjashtues, sjellje të padenjë zyrtare, shkelje flagrante të normave të Protokollit të Shtetit e mungesë respekti për institucionet e qytetarët e Lezhës. Në këto kushte, Presidenti, thotë njoftimi i Presidencës, "refuzoi të bëhej pjesë formale e pranisë në këtë ceremoni. Në këto rrethana, Presidenti e gjykon të nevojshme që në përvjetorin e 568-të të Kuvendit të Lezhës dhe të nisjes së festimeve zyrtare për 100-vjetorin e shtetit shqiptar, të komunikojë me qytetarët e Lezhës e të gjithë Shqipërisë me mesazhin, të cilin në rrethana normale të një vendi demokratik, do duhej të lexohej në ceremoninë solemne në Lezhë." Po t'i referohemi ceremonialit të Republikës së Shqipërisë, përshendetja zyrtare në manifestime dhe festa të rëndësishme bëhet menjëherë pas fjalës së hapjes, të cilën e mban autoriteti më i lartë mikpritës, në rastin konkret, kryetari i bashkisë. Përshendetjen, vijon ceremoniali, e mban autoriteti më i lartë i shtetit, i ngarkuar sipas programit të evenimentit ose i caktuar që më parë me protokoll. Dhe sipas protokollit të Republikës, përparësia në Republikën e Shqipërisë është President i Republikës, Kryetar i Kuvendit e pastaj kryeministër. Pra, në mungesë të Presidentit Topi, fjalën duhet ta kishte mbajtur kryetarja e Kuvendit Topalli e jo kryeministri Berisha. Mirepo ceremoniali i Republikës ka edhe një moment tjetër, që thotë se në asnjë rast s'përshendesin në të njëjtin aktivitet Presidenti, Kryetari i Kuvendit e Kryeministri. Pra, nëse Presidenti Topi do fliste, pas tij s'mund ta marrte fjalën kryeministri Berisha. Kështu të paktën, thuhet në letër. Në praktikë, fjalën e rastit e mbajti kryeministri Berisha. Me sa duket këtu ka qënë tërë burimi i "keqkuptimit", pasi nëse do fliste Topi, Berisha s'kishte asnjë gjasë të fliste, dhe ku, pikërisht në ditën e Besëlidhjes së Lezhës i organizuar nga Gjergj Kastriot Skënderbeu i atyre kohrave të arta të qëndresës kundër turqve.
Pas përjashtimit të presidentit Topi nga pjesëmarrja në përvjetorin e Besëlidhjes së Lezhës, asnjë nga ambasadorët e akredituar në Tiranë nuk ka udhëtuar drejt Lezhës për të qënë prezent në këtë ditë të madhe për shqiptarët, duke e bojkotuar këtë aktivitet.
( ne foto Berisha dje ne aktivitetin festiv ne Lezhe, me rastin e 568 vjetorit te Beslidhjes)
(sg/shqiptarja.com)

  • Sondazhi i ditës:
    25 Nëntor, 08:30

    Takimet jashtë, mendoni se diaspora do marrë pjesë masivisht në votime?

Lajme të tjera



×

Lajmi i fundit

Rritja e pensioneve, Rama nga Bulqiza: Do rritet fuqia blerëse e më shumë se 700 mijë pensionistëve! Reformën e bëmë ne dhe tregon qartë kush di të qeverisë

Rritja e pensioneve, Rama nga Bulqiza: Do rritet fuqia blerëse e më shumë se 700 mijë pensionistëve! Reformën e bëmë ne dhe tregon qartë kush di të qeverisë

26 Nëntor, 11:21