Bilanci i 2020-s/ Guvernatori i BSH, Sejko: Masat e pjesshme kufizuese po ngadalësojnë ekonominë, nga shtyrja e kredive kanë përfituar 25 mijë klientë

Guvernatori i Bankës së Shqipërisë Gent Sejko në konferencën e fundit për këtë vit tha se ekonomia u përmirësua në tremujorin e tretë të vitit, por u ngadalësua disi pas masave kufizuese. Guvernatori njoftoi se  masat e marra nga Banka e qendrore përmirësuan situatën e kredive në vend

“Pandemia COVID-19, ka shkaktuar tkurrje ekonomike, rritje papunësie, vështirësi për biznesin dhe inflacion të dobët”, u shpreh në konferencën e fundit për këtë vit guvernatori Gent Sejko.

Kështu e ka nisur guvernatori i Bankës së Shqipërisë Gent Sejko konferencën  fundit të politikës monetare për këtë vit. Sipas tij ekonomia e vendit njohu një rikuperim në tremujorin e tretë, por tashmë po ndikohet nga masat e pjesshme kufizuese.

“Ekonomia e vendit ka shënuar kthesë rikuperimi në tremujorin e tretë, megjithatë rikuperimi ekonomik mbetet i rrezikuar. Përkeqësimi i situatës epidemiologjike dhe rikthimi i disa kufizimeve në tremujorin e katërt sugjerojnë një rikuperim më të ngadaltë të aktivitetit ekonomik”, pohoi guvernatori i BSH.

Guvernatori bëri edhe një bilanc për kërditë e shtyra dhe ristrukturuar në vend pas ndërhyrjes së bankës qendrore me moratorium.

“Po ashtu, ne lehtësuam në mënyrë të përkohshme rregulloret e funksionimit të sektorit bankar, duke nxitur shtyrjen në kohë të pagesës së kësteve të kredisë dhe ristrukturimin e saj. Nga kjo lëvizje u vendos në moratorium mbi 40% e portofolit të kredisë bankare, duke lehtësuar barrën financiare mbi bizneset dhe familjet në vështirësi të përkohshme. Gjithashtu, nga ristrukturimi i kredisë kanë përfituar mbi 25 mijë klientë bankarë, duke rritur qëndrueshmërinë e plan-bizneseve të tyre afatgjata”, u shpreh Sejko.

Nga ana tjetër guvernatori pohoi se norma bazë e interesit do të mbetet 0.5%, për sa aq kohë sa rreziqet do të jenë prezente në ekonomi.

“Këshilli Mbikëqyrës vlerësoi se qëndrimi aktual i politikës monetare është i përshtatshëm. Për këtë arsye, ai vendosi: të lerë të pandryshuar normën bazë të interesit, në nivelin 0.5%; të lerë të pandryshuara normat e interesit të depozitave dhe kredive njëditore, respektivisht në nivelin 0.1% dhe 0.9%. Këshilli Mbikëqyrës vëren se zhvillimet e pritura makroekonomike janë të rrethuara nga pasiguri dhe të ekspozuara ndaj rreziqeve të kahut të poshtëm. Në veçanti, rreziqe të kahut të poshtëm burojnë nga: përkeqësimi i situatës epidemiologjike dhe thellimi i ndikimit të saj në ekonomi; shkalla e dëmtimit të kapaciteteve prodhuese dhe mundësia e një rikuperimi më të ngadaltë të kërkesës së brendshme dhe asaj të huaj; lindja e vështirësive në mekanizmin e transmetimit të politikës monetare, në formën e rritjes së normave të interesit dhe kostove të financimit të sektorit privat, në formën e rritjes së ngadaltë të kredisë bankare, apo në formën e luhatjeve të forta të treguesve të tjerë të tregut financiar”, pohoi Sejko.

Sa i takon kredive me probleme Sejko tha se mbeten në nivel të qëndrueshëm, por njoftoi se ky ato do të vihen në provë vitin që vjen .

K.T./r.k./Shqiptarja.com

TAG:
• banka e Shqiperise
• ekonomi
• gent sejko