TIRANË- Në Prokurorinë e Posaçme 2 prokurë dhe 9 agjentë të BKH-së janë vënë në dispozicion vetëm për hetimet ndaj ish zv. Kryeministres Belinda Balluku, që është e pandehur për shkelje në tendera dhe e dyshuar për korrupsion e pastrim parash.

Kreu i SPAK Klodjan Braho e cilësoi prioritetin kryesor të SPAK këtë dosje, për shkak të rëndësisë së veçantë të subjektit.

“Është çështja me prioritetin më të lartë për SPAK kohët e fundit. Në hetim janë angazhuar 9 oficerë të BKH-së dhe 2 prokurorë, për shkak të nivelit të lartë të subjektit. Hetimet janë në vijim”, tha Braho. 

Sa i takon vendimit të PS për të refuzuar kërkesën e SPAK për arrestin, Braho tha se kjo nuk i ka penguar hetimet, edhe pse i dëmton ato. Nëse do të ketë një kërkesë të re, ai tha se kjo do të varet nga rrethanat e reja që kanë dalë nga hetimi.

“Imuniteti nuk e pengon hetimin, por mendoj se ai është një garanci e panevojshme në një shoqëri demokratike. Prokurorët dhe gjyqtarët nuk gëzojnë imunitet", vijoi Braho. 

Ndërkohë që prej orëve të para të mëngjesit të së enjtes, SPAK ushtroi  kontrolle me miratim të GJKKO. Report Tv ka mësuar se agjentët e BKH zbatuan mandatet për kontrolle personale, në shtëpi e zyra të lidhura me Igli Taren dhe Arbër Bazin, pronar i kompanisë së ndërtimit ‘Alko Impex’. Operacioni u krye në qytete si Tirana, Durrësi e Vlora.

Vetëm një ditë më parë SPAK vendosi zgjatjen e hetimeve për dosjen Balluku. Ish nr. 2 i qeverisë është marrë e pandehur për shkelje të barazisë në tendera për Tunelin e Llogarasë dhe lotin nr. 4 të Unazës së Tiranë, ndërkohë që para pak muajsh i është regjistruar emri si e dyshuar edhe për korrupsion e pastrim parash.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

Rendit zhvillimet sipas orarit:
Ora 12:52
‘Balluku’, Braho: Çështja me prioritetin më të lartë për SPAK! Kërkesë e re për arrest? Do varet nga rrethanat e reja që kanë dalë nga hetimi

1781075296_belindaballuku.jpg

Çështja me prioritetin më të lartë për SPAK. Kështu i ka konsideruar kreu i SPAK, Klodian Braho për hetimet për dosjen e ish-numrit 2 të qeverisë Belinda Balluku. I pyetur nga gazetarët lidhur me kontrollet që po zhvillohen BKH për këtë çështje, Braho nuk dha shumë detaje por theksoi se 9 agjentë të BKH-së dhe 2 prokurorë janë në dispozicion të çështjes. 

Sa i takon vendimit të PS për të refuzuar kërkesën e SPAK për arrestin, Braho tha se kjo nuk i ka penguar hetimet. Nëse do të ketë një kërkesë të re, ai tha se kjo do të varet nga rrethanat e reja që kanë dalë nga hetimi.

Kontrollet për çështjen Balluku, konkretisht për çfarë po kryhen? A do t’i drejtoheni sërish Parlamentit me një kërkesë të re?

Klodian Braho: Kjo është një çështje nën hetim dhe siç e dini nuk mund të jap informacion. Është çështja me prioritetin më të lartë për SPAK kohët e fundit. Në hetim janë angazhuar 9 oficerë të BKH-së dhe 2 prokurorë, për shkak të nivelit të lartë të subjektit. Hetimet janë në vijim. Do të vijë momenti kur ato të përfundojnë dhe atëherë do të jemi më të plotë në lidhje me atë çfarë ka ndodhur. Janë kryer dhe po kryhen shumë veprime hetimore. Bëhet fjalë për një dosje të ngjeshur.

SPAK ka qenë i qartë për atë çfarë ka kërkuar dhe arsyet pse e ka kërkuar. U mor një vendim, sigurisht jo ai që ne kërkuam. Mund të mos jemi dakord me të, por vendimi është detyrues për ne.

Megjithatë, hetimet kanë vazhduar, madje kanë ecur edhe më tej. Nëse do të bëhet apo jo një kërkesë e re, kjo do të jetë një vendimmarrje e përbashkët. Ajo do të varet nga rrethanat e reja që kanë dalë ose që mund të dalin gjatë hetimit, por edhe nga vendimi që ka marrë Parlamenti. Pra, do të varet nga fakti nëse rrethanat e reja janë të mjaftueshme për të kapërcyer argumentet mbi të cilat u mbështet vendimi i Parlamentit.

Braho tha se "imuniteti nuk e pengon hetimin, por mendoj se ai është një garanci e panevojshme në një shoqëri demokratike. Prokurorët dhe gjyqtarët nuk gëzojnë imunitet."

SI.E./Shqiptarja.com