Juglindja 5 ditë në izolim/ ARRSH shemb urën në Librazhd, ‘rikthen’ Shkumbin në shtrat! Do të ndërtohet rruga provizore, s'ka afat për hapjen (VIDEO)

Çdo ditë mësuesë, infermierë, mjekë, në disa zona të juglindjes po përballen me vështirësinë për të arritur në punë për shkak të shembjes së rrugës Librazhd-Pogradec, e cila prej ditësh është e pakalueshme.

Me mjete të ndryshme ata mbërrijnë pak kilometra nga vendi ku ka ndodhur shembja. Detyrohen të ecin afro 30 minuta në këmbë, e nga zona e shembjes, siç shihet dhe në foto, me vështirësi duhet të kalojnë në krahun tjetër, nga ana e Pogradecit, ku i pret një mjet tjetër transporti që bën dhe dërgimin e tyre në vendet e punës. Të njejtat peripeci, janë të detyruar të kalojnë, dhe në kthim e me gjasë, ky do të jetë rituali i përditshëm, për një kohë të gjatë.

Foto e shkrepur në tetor 2025, shigjetat tregojë ku ka devijuar aksi sot dhe kamionët duke marrë inerte

Një foto e publikuar në tetor të vitit 2025 nga lumi Shkumbin në rrjedhën përgjatë Dragostunjës, shihet qartë distanca mes aksit rrugor tashmë të degraduar Librazhd-Prrenjas dhe lumit. Ndërkohë sot, nga rrëshqitjet masive, rruga ka përfunduar buzë lumit Shkumbin. Por cila ka qenë arsyeja që ka shkaktuar erozionin aktiv edhe sot në këtë zonë? Dyshohet se shkak janë bërë gërryerjet në basenin e lumit për marrjen e inerteve, pranë aksit Librazhd-Prrenjas.

Në foto shihen kamionë e fadroma duke zhvilluar këtë aktivitet që duhet leje nga shteti. Tani janë 5 kompani që kanë leje aktive për të marrë inerte nga lumi Shkumbin, të cilat kanë fituar tenderat për ndërtimin paralelisht të aksit Elbasan-Qafë Thanë pjesë e Korridorit VIII, ndërsa diferenca e rrjedhës së një viti më parë nga sot dallohet fare mirë me sy të lirë. Sot rrjedha e lumit Shkumbin është devijuar tërësish dhe i është afruar kodrës. Sot kanë nisur punimet për devijimin e rrjedhës së lumit Shkumbin për shkak të ndërtimit të rrugës së re provizore që është planifikuar për tu ndërtuar me qëllim dhënien e një zgjidhje të përkohshme të qarkullimit.

Rruga e shembur sot dhe rrjedha e dejivuar e lumit Shkumbin

Report Tv sjell pamjet me dron nga punimet që tashmë kanë nisur për hapjen e një aksi të ri, alternativë për zgjidhjen e qarkullimit pas daljes jashtë funksioni si pasojë e shembjes së aksit Librazhd-Prrenjas. Rruga e  re është planifikuar të jetë rreth 1.3 kilometra dhe do të shtrihet buzë lumit Shkumbin, ku dhe kanë nisur punimet për devijimin e rrjedhës.

Drejtori i Planifikimit Strategjik dhe Operacioneve në Autoriteti Rrugor Shqiptar, Indrit Koleci, ka folur mbi situatën në aksin Librazhd–Pogradec, pas shembjes së ndodhur në zonën e njohur si “Arrat e Gurrës”.

Sipas Kolecit, aktualisht nuk mund të jepet një afat i saktë për stabilizimin e plotë të rrëshqitjes, pasi po vijojnë studimet teknike në terren.

“Afate nuk mund të themi, pasi kemi bërë relevim të zonës së poshtme të lumit. Kemi bërë një rilevim të shtratit të lumit. Vazhdojmë studimet në pjesën e sipërme për stabilizimin e masës së rrëshqitjes. Afate s’mund t’ju themi pasi janë volume të konsiderueshme,” u shpreh ai.

Sipas tij, brenda 3-4 ditëve pritet të ketë një vlerësim më të qartë për kohëzgjatjen e ndërhyrjes dhe për një afat paraprak të punimeve.

Ndërkohë drejtori i ARRSH, Ami Kozeli tha 

"Kemi një mobilizim total. Nga mbrëmja e djeshme kontraktori ka nisur vendimin e këshillit teknik, konkretisht mbulimin e shtratit lumor, demolimin e urës, dhe lehtësimin e masës së rrëshqitjes në planin e sipërm, kjo për të çuar skarpatën drejt një ekuilibri natyral të saj. Shërbimi gjeologjik ka sjellë gjithë ekspertizën. Sot janë 70 eksvatorë dhe  20 kamionë që po punojnë. Inxhinierët e autoritetit rrugor kanë ardhur për të bërë inspektimet e nevojshme", tha ndër të tjera Kozeli.