Bllokohen dy gomone me motorë në Palasë e Zvërnec, 100 mijë lekë të reja gjobë drejtuesve, shkelën perimetrin e sigurisë 

Vlore- Ardhja e sezonit të plazhit nxit edhe më shumë nevojën e monitorimit të hapësirave detare me qëllim rritjen e parametrave të sigurisë së pushuesve në plazhet e vendit për të parandaluar tragjedi të tilla si ajo e Jonadës, 7 vjeçare e cila në gushtin e 2022 humbi jetën teksa po lahej në det. Vajza u përplas nga helikat e gomones që drejtohej nga ish polici Arjan Tase i cili kishte hyrë në zonën (brenda kordonit të sigurisë) ku notonte babai me vajzën e tij

Brenda 24 orëve në Palasë dhe Zvërnec janë bllokuar dy mjete lundruese që shkelën perimetrin e sigurisë, duke rrezikuar jetën e pushuesve. Ndaj 2 drejtuesve policia informon se mori masa administrative me gjobë 100 mijë lekë të reja.

"Shërbimet e Policisë Kufitare Dhërmi, në bashkëpunim me Njësinë Policore Detare, ndërhynë menjëherë në plazhin e Palasës, duke bllokuar një mjet lundrues gomone që kishte shkelur perimetrin e sigurisë ujore për plazhistët, duke vënë në rrezik jetën e tyre dhe ndëshkuar me masë administrative 100,000 lekë të rinj drejtuesin e mjetit lundrues.

LEXO EDHE:
Atentat apo aksidentale? Misteri pas vdekjes së biznesmenit Armandi Nelaj! Policia në pritje të ekspertizës së shkaqeve të shpërthimit

Gjatë patrullimit të vijës bregdetare, me qëllim garantimin e rendit dhe sigurisë publike në zonat turistike, si dhe për kontrollin e përdorimit të mjeteve lundruese, ndërhynë dhe në plazhin e Zvërnecit, duke bllokuar një tjetër mjet lundrues gomone që kishte shkelur perimetrin e sigurisë ujore për plazhistët, duke vënë në rrezik jetën e tyre" informoi policia.

Policia Kufitare, në bashkëpunim me Njësinë Policore Detare dhe patrullat tokësore, vijon monitorimin dhe kontrollin e të gjitha zonave bregdetare dhe fton qytetarët që të denoncojnë në numrin pa pagesë 112 çdo rast paligjshmërie, duke iu garantuar anonimat, reagim të shpejtë dhe profesional.

S.G/Shqiptarja.com

TAG:
• Palase
• Vlore
• zvernec