Sot në orën 21:00 do të mësohet finalisti tjetër i Kupës së Botës 2026, teksa Anglia do të përballet me Argjentinën në stadiumin e Atlantës për raundin gjysmëfinal të turneut. Të dyja kombëtaret kanë zhvilluar paraqitje shumë të mira në këtë turne, ndërsa për objektiv kanë vetëm pjesëmarrjen në finale.

Mungesat e të dyja kombëtareve

Anglia: 'Tre Luanët' vazhdojnë të kenë mungesë opsionesh natyrale në krahun e djathtë të mbrojtjes. Jarell Quansah është i pezulluar, ndërsa Reece James nuk pritet të rrezikohet nga minuta e parë për shkak të historikut të tij me lëndimet. Djed Spence mund të rikthehet në formacionin titullar, megjithëse Ezri Konsa mund të vazhdojë të luajë në atë rol. Ndërkohë, John Stones pritet të formojë dyshen e qendër së mbrojtjes me Marc Guehi.

Jordan Henderson do të mungojë pasi iu nënshtrua një operacioni në kyçin e dorës, pas lëndimit që pësoi në Mexico City. Declan Rice nuk ishte në gjendjen e tij më të mirë fizike në ndeshjen ndaj Norvegjisë për shkak të një sëmundjeje, por Thomas Tuchel shpreson që mesfushori i Arsenalit të jetë gati për ta nisur ndeshjen nga minuta e parë përkrah Elliot Anderson.

Argjentina: Kampionët në fuqi pritet të zbresin në fushë me të njëjtin formacion që mposhtën Zvicrën, pasi Lionel Scaloni nuk pritet të bëjë ndryshime të mëdha. Lionel Messi do ta nisë ndeshjen nga minuta e parë në sulm, ndërsa trajneri argjentinas duhet të zgjedhë mes Julian Alvarez dhe Lautaro Martinez për ta shoqëruar në repartin sulmues.

Në mesfushë, Leandro Paredes mund ta ruajë vendin e titullarit për t'i dhënë ekipit më shumë ekuilibër në fazën mbrojtëse, pavarësisht ndikimit pozitiv që pati Thiago Almada pasi u fut në fushë nga stoli në ndeshjen e kaluar.

Historiku i përballjeve

Në gjithë historinë mes tyre, Anglia dhe Argjentina janë përballur 14 herë. Gjashtë janë fitore të Anglisë, tre të Argjentinës, ndërsa pesë sfida janë mbyllur në barazim. 24 gola ka shënuar Anglia në portën e Argjentinës, kundrejt 19 të pësuarve.

Pesë herë janë përballur më parë të dyja skuadrat në Kupat e Botës. Në vitin 1962 Anglia fitonte 3-1 në fazën e grupeve, por fitorja më e madhe e 'Tre Luanëve' ishte ajo e vitit 1966, 1-0 në gjysmëfinale, teksa më pas ngriti trofeun e vetëm.

Argjentina u përgjigj në Botërorin e vitit 1986 duke fituar 2-1 në gjysmëfinale me dy gola të Maradonës, njëri prej tyre i devijuar me dorë dhe i quajtur si 'Dora e Zotit'. Në Botërorin që atë vit u zhvillua në Meksikë, Argjentina në fund doli triumfuese.

Në Kupën e Botës të vitit 1998 të dyja skuadrat u përballën në fazën e 1/8-ave, me Argjentinën që fitoi 6-5 me penallti. Në 2002 Anglia fitoi 0-1 kundër Argjentinës në fazën e grupeve.

Ndeshja e fundit mes tyre daton më 11 nëntor 2005 (afro 21 vite më parë), një miqësore që u fitua 3-2 nga Anglia. Lionel Messi ishte grumbulluar në atë duel, por nuk mori minuta. Ndeshja e sotme do të jetë e para për Lionel Messin që do të luajë kundër Anglisë.

Forma

Anglia ka siguruar një tjetër gjysmëfinale të madhe, të katërtën që nga viti 2018 dhe në këtë përballje vjen pas katër fitoreve radhazi. Megjithatë, problemet në mbrojtje kanë qenë të pranishme gjatë gjithë turneut dhe vazhdojnë të jenë një shqetësim për Thomas Tuchelin. Edhe Argjentina ka treguar karakter për të arritur deri në këtë fazë, duke kaluar ndeshje dramatike ndaj Kepit të Gjelbër, Egjiptit dhe Zvicrës, ndërsa ka zgjatur serinë e fitoreve në 13 ndeshje radhazi.

Lionel Messi tashmë ka regjistruar shifra dyshifrore për kontributet në gola për Kupën e Dytë të Botës radhazi, ndërsa fuqia sulmuese e Argjentinës e bën skuadrën kampione të botës një provë shumë të vështirë për anglezët.

Anglia ka cilësi të mjaftueshme në repartin sulmues me Harry Kane dhe Jude Bellingham për ta mbajtur ndeshjen të ekuilibruar, por përvoja e Argjentinës në turnetë e mëdhenj dhe balanca më e mirë në lojë mund t'i japin ekipit të Lionel Scalonit një avantazh në këtë përballje.

Të martën Spanja fitoi 2-0 kundër Francës duke siguruar një vend për finalen e 19 korrikut.

Për të lexuar lajme të tjera nga Botërori KLIKONI KËTU.

Për të parë rezultatet e ndeshjeve të Botërorit KLIKONI KËTU.

Rendit zhvillimet sipas orarit:
Ora 16:22
VIDEO/ 40 vjet pas 'Dorës së Zotit' dhe 'Golit të Shekullit' të Maradonës kundër Anglisë, Argjentina gjen sërish sot 'Tre Luanët'

1784125539_diegoarmandomaradona.JPG

Më 22 qershor 1986, Diego Armando Maradona shënoi të dy golat me të cilët kombëtarja argjentinase, e udhëhequr nga Carlos Salvador Bilardo, mundi Anglinë 2-1, duke u kualifikuar në gjysmëfinalet e Kupës së Botës në Meksikë, të cilën në fund e fitoi.

Në orën 16:09 me orën lokale të Argjentinës, në Mexico City, në stadiumin Azteca, një qenie mitike me emrin Diego Armando Maradona shënoi golin e dytë kundër Anglisë, golin më të bukur në histori, golin që do të mbetet në analet e futbollit. Atë të diel pasdite, në perëndim të dimrit, Argjentina u ndal plotësisht. Në të gjithë vendin, rrugët ishin të shkreta dhe njerëzit u dyndën para televizorëve dhe radiove të tyre për të ndjekur çerekfinalet e Kupës së Botës në Meksikë.

Pas një pjese të parë të tensionuar, të ngushtë dhe të luftuar fort, 'Zoti i futbollit' u largua nga qielli dhe brenda pak minutash bekoi kombëtaren argjentinase, duke i udhëhequr ata drejt një fitoreje përfundimtare 2-1.

Në minutën e 51-të, Diego shfrytëzoi një largim të dobët të topit nga mbrojtësi Kenny Sansom dhe ndërsa Peter Shilton doli për të ndaluar, ai e shtriu grushtin për golin që u përjetësua si "Dora e Zotit".

Megjithatë, kryevepra e Maradonës do të vinte katër minuta më vonë, në minutën e 55-të të ndeshjes. Maradona mori një pasim nga mesi i fushës nga Hector Enrique dhe iu deshën 10.6 sekonda për të arritur te porta angleze, me një shpejtësi prej 14.4 km/orë, duke përshkuar 60 metrat me topin në këmbë, sikur të ishte i dashuruar me këmbën e tij të majtë magjike, për të 'shpërbërë' në tokë Glenn Hoddle, Peter Reid, Kenny Sansom, Terry Butcher, Terry Fenwick dhe portierin Peter Shilton dhe për të shënuar atë gol të mrekullueshëm.

Maradona rrëfente se si shënoi dy golat e tij

Lidhur me golin e parë, të njohur si "Dora e Zotit", Diego tha: "Po kërkoja një goditje të dyfishtë sepse anglezët ishin si shkëmbinj. Fenwick, Butcher, të gjithë në mbrojtje ishin të shkëlqyer. Dhe Sansom gjithashtu, i cili është ai që ma pasoi. Valdano nuk ma pasoi. Ai e parashikoi Sansomin dhe ishte vetë Sansom ai që donte t'ia pasonte Shilton sepse në atë kohë mund ta ktheje topin te portieri. Kur e pashë të ngjitej lart, thashë: 'Nuk do ta arrij kurrë, zbrit poshtë të lutem'. Më erdhi një ide: ta fus dorën brenda dhe ta godas me kokë. Sigurisht, kur u ula, nuk e kuptova se ku ishte topi. Pashë dhe topi ishte në rrjetë! Pastaj fillova të bërtisja: 'Gol, gol!' Dhe Checho, ai idiot Checho, më pyeti nëse e kisha bërë golin me dorë. 'Mbylle gojën, idiot dhe më përqafo', i thashë. Pastaj të gjithë filluan të më përqafonin. Valdano më pyeti gjithashtu: 'Mos më thuaj që ishte...'" "Me dorën time? Dhe unë i dhashë të njëjtën përgjigje. 'Do të ta them më vonë, Valdano, mos më shqetëso më'," shpjegoi më vonë Maradona për golin.

Anglia dhe Argjentina do të përballen mbrëmjen e sotme (21:00) në gjysmëfinalen e Kupës së Botës 2026, në një duel që do të përcaktojë skuadrën e dytë finaliste të turneut, pas Spanjës.

S.Dh/Shqiptarja.com