Braçe filmon rrugën Lushnje- Berat:
Edhe Merkel i ka zili rrugët tona

TIRANE- Deputeti socialist i qarkut të Beratit, njëkohësisht nënkryetari i grupit PS, Erjon Braçe, vazhdon të denoncojë infrastrukturën e dëmtuar të rrugës Lushnje- Berat e cila vetëm përkeqësohet dita ditës. Nëpërmjet rrjetit social facebook, Braçe bëri publike sot në mëngjes fotot e rrugës Lushnje- Berat të cilën siç thotë vetë po e përshkon sot.

Rruga është e mbuluar nga uji i cili ka dalë nga kanali ndërsa makinat duken se zhyten në gropat e thella. Duke përshkruar foton Braçe ironizon me kryeministrin Berisha duke i thënë se as kancelarja gjermane nuk mund të arrijë këtë bum ekonomik.

“Tani sapo ne "Mrekuline infrastrukturore" Lushnje Berat!! Gropat 30 cm të thella e të mbuluara nga uji-më keq nga Java në javë! Ky është bumi ekonomik i Salih Argita Shkelzen Berisha! Të plasë zonja Merkel, të plasë! Si bën dot rrugët me kaq gropa në Gjermani!”



Edhe pak ditë më parë, më 13 korrik Braçe denoncoi dëmtimin e rrugës duke publikuar një foto. “Sali, jam une "kundershtari"! Prape! Kjo është rruga Lushnje-Berat, mbi të po udhetoj akoma. Kam 55 minuta për vetëm 38 kilometra! Si rregull rruga duhet të jetë e sheshtë këtu është vetëm grope!! Shihe foton!
Fusnote:mos u shastis nga uji, është i kanalit e ka dale mbi rruge, si përherë!”- shkruan Braçe në përshkrimin që i bën fotos.