Fshati Zogjaj në Dibër është drejt braktisjes totale. Nga 110 familje që ishin dikur, tanimë kanë mbetur vetëm 35. Arsyet lidhen kryesisht me perspektivën e munguar, disa nga pamundësia ekonomike e të tjerë nga mungesa e shërbimeve kanë vendosur të largohen.

Banorët flasin me dhimbje për gjendjen aktuale të fshatit, teksa shikojnë banesat e fqinjëve të tyre dita- ditës që po degradohen, pasi janë të pabanuara.

“Këtu duhet të punosh 6 muaj në behar, për 6 muaj dimër. Jetë e vështirë. S’kanë ngel as 20 shtëpi. Disa janë shpërngulur jashtë shtetit, ndërsa disa janë vendosur jashtë fshatit”

“Ne merremi me blegtori, lule mali, një asistencë apo pension kush merr. Kjo është mënyra e jetesës.”

“Kur e shoh fshatin tim që çdo ditë rrënohet, çdo ditë shemben shtëpi, prishen avlli, prishen muret me thënë të drejtën mua më pikon zemra.

“Largohen sepse këtu nuk kanë punë, prandaj e tradhtojnë vendin”, thonë banorët.

Haxhi Pulja Administrator i kësaj njësie pranon largimet masive duke iu referuar dhe numrit të pakët të nxënësve që frekuentojnë shkollën. 

“Ne në fshatin Zogjaj kemi dhe shkollën 9-vjeçare, shkollë e cila grumbullonte dhe fshatrat e tjerë të asaj zone. Sot në atë shkollë kemi një numër prej 80 fëmijësh nga 200 që ka pasur", tha ai.

Megjithatë shikohet me shpresë dhe rikthim i tyre kjo dhe nga investimi në infrastrukturë që ka ndërmarrë Bashkia Bulqizë.

“Është ndërtuar një rrugë me gjatësi 5.3 km, një investim goxha i dashur, i adhuruar nga ana e banorëve që shpresojmë të ndikojë drejtëpërndrejtë në rritje ekonomike, por dhe rikthimin e atyre që janë larguar për arsye të infrastrukturës, por edhe shërbimeve të tjera", vijoi ai.

Banorët e paktë që kanë ngelur në fshat shprehen të kënaqur për rrugën e re e cila iu shërben për nxjerrjen e prodhimeve në treg dhe iu lehtëson lëvizjet.