Brazili i shpall luftë Google News

Brazili është vendi i parë që i shpall ''luftë'' Google News, seksioni i lajmeve i motorit më të famshëm të kërkimit në botë. Në një takim që u mbajt kohët e fundit në Sao Paolo nga ANJ, (Federata e Botuesve Braziliane) dhe pas rekomandimeve të kesaj te fundit, 154 gazeta braziliane i hoqën lajmet nga Google News.

Këto gazeta përfaqësojnë 90 për qind të tregut në Brazil dhe në mesin e tyre janë gazetat e mëdha, si Folha, Estado e Sao Paulo dhe O Globo e Rio de Janeiro. Në praktikë, duke përdorur shërbimin brazilian të Google News Search, këto gazeta i kane hequr përmbajtjet e tyre, ndërkohë ato janë duke publikuar në letër dhe në versionet dixhitale përmbajtjet origjinale të gazetave të tyre.

Protesta e gazetave braziliane është e ngjashme me atë të kryer edhe në vende të tjera të botës. Google është akuzuar se nuk paguan asgjë për përmbajtjen dhe përfiton mbi punën e të tjerëve. Në Brazil, sipas redaktorit Carlos Fernando Lindenberg, qasja në lajme nëpërmjet Google News është modeste dhe nuk po ndihmon për të rritur audiencën", ndërsa për ata që duan një informacion të shpejtë, shërbimi i tyre zvogëlon mundësinë që përdoruesi të klikojë në lajmet e vendosura prej tyre."

Ndërkohë, justifikimi i Google nuk është i ndryshëm nga ajo që ka dhënë edhe për shtete e tjera të botës: "Puna jonë sjell vetëm audiencë në faqet e internetit të gazetave. Ne marrim një miliard klikime nga Google News, të cilat pasqyrohen tek botuesit e lajmit". Në Evropë, hartuesit e politikave në Gjermani dhe Francë, po diskutojnë rregulla të reja për t’i kërkuar Google të njohë të drejtat e autorit dhe të paguajnë për lajmet që publikojnë. Në Belgjikë, gazetat e mëdha e kanë lënë shërbimin e Google News prej shumë kohësh.

(ad.ti/shqiptarja.com)