Britani e Madhe, Jeremy Corbyn
rizgjidhet në krye të Laburistëve

Zgjedhjet e Partisë Laburiste në Britaninë e Madhe kanë përfunduar pa surpriza.
 
Jeremy Corbyn ka fituar përballjen ndaj rivalit të tij, Owen Smith, me një epërsi prej prej 61.8% të votave në favor të tij. Owen Smith u votua në masën 38.2% vota. E përkthyer në vota, Corbyn fitoi me një diferencë të madhe, duke marrë 313 000 vota në krahasim me rivalin Smith, i cili mori 193 000 vota. 
 
Corbyn kaloi një periudhë të vështirë politike, pas referendumit të 23 qershorit që shënoi edhe daljen e Britanisë së Madhe nga Bashkimi Europian. Brenda Partisë Laburiste nisën debate të ashpra shpesh herë edhe deri në fyerje mes deputetëve si dhe ndaj kreut të laburistëve, Corbyn. 

Corbyn ka thënë se do të përpiqet të ndërtojë një marrëdhënie të re me deputetët, por para se fitorja e tij të shpallej zyrtarisht, Corbyn theksoi se "është përgjegjësi të punohet për ruajtjen e demokracisë në partinë tonë dhe të respektohet udhëheqja si dhe ata që zgjidhen".
 
Pas fitores së shënuar këtë të shtunë për një tjetër mandat në krye të Partisë Laburiste, Jeremy Corbyn do të nisë menjëherë nga puna ndërtimin e kabinetit hije. Corbyn beson se shumë shpejt mund të fitojë zgjedhjet parlamentare ndaj qeverisë djathtiste të David Cameron, siç e quan ai. Për Corbyn, qeveria e Theresa May, nuk është qeveri e re, pasi është vazhdimësi e asaj të Cameron.
 
Jeremy Corbyn kërkoi mbështetjen e elektoratit laburist, për të rikthyer të majtën në pushtet. 

Redaksia Online
l.q/Shqiptarja.com