Britania "po mendon tërheqjen"
nga Eurovizion

LONDER- Britania mund të mos konkurrojë më në edicionet e ardhshme të “Eurovision”, pasi rezultati i dobët i javës së shkuar ngjalli një irritim kombëtar ndaj festivalit që bashkon këngët fituese të festivaleve shteterore.
Të përfaqësuar nga veterani 76-vjeçar, Engelbert Humperdink, britanikët u renditën të dytët nga fundi në natën finale.
Midis 42 vendeve pjesëmarrëse, vetëm Irlanda, Letonia, Belgjika dhe Estonia dhanë pikë për baladën “Love will set you free”.
Me mijëra anglezë iu drejtuan “BBC”-së duke i kërkuar që të bojkotojë edicionet e ardhshme, për shkak të votimit tejet të politizuar, që e pengon vendin që të ketë ndonjë shans real për sukses.
Nga “Twitter, një prej prezantuesve më të njohur në Britani, Philip Schofield, udhëhoqi “kryqëzatën”, duke thënë: “Është koha që të tërhiqemi një herë e përgjithmonë. Edhe sikur të dërgojmë Robbie Williams nuk kemi asnjë shans për fitore me këtë votim politik”.

Sipas shtypit britanik, burime pranë “BBC” kanë konfirmuar se kjo çështje po studiohet.

Megjithatë, zyrtarisht, një zëdhënës i “British Broadcasting Corporation” hodhi poshtë këto spekulime, duke thënë se: “Votimi politik mund të ketë ndonjë lloj ndikimi në renditjet e këngëve, por gjithmonë fituese arrin të shpallet kënga më e mirë”.
(b.a/shqiptarja.com)