Për vitin 2027 projektbuxheti i Ministrisë së Arsimit parashikohet të jetë në vlerën e 67,95 miliardë lekëve, me një rritje prej 4,8% krahasuar me vitin e kaluar. Gjatë prezantimit të pr/buxhetit ministrja Mirela Kumbaro tha se arsimi i lartë përfiton 1.25 miliardë lekë shtesë dhe vëmendje e veçantë do t’i kushtohet mbështetjes së studentëve që vijnë nga familje në nevojë.

Mbështetja financiare ndaj studentëve u njoftua fillimisht nga kryeministri Edi Rama një javë më parë, ndërsa ai përsëriste thirrjet për dialog me të rinjtë, e përfshirë në protestat e përditshme në kryeqytet.

Ministrja e Arsimit Mirela Kumbaro deklaroi sot në Komisionet parlamentare se paketa financiare shtrihet për disa kategori. 

‘’Nga paketa e re e mbështetjes financiare parashikohet të përfitojnë mbi 11 500 studentë. Prej tyre, 5 900 studentë nga familjet në nevojë do të marrin nga 25 mijë lekë në muaj, ndërsa 5 500 studentë me notë mesatare 9–10 do të përfitojnë nga 10 mijë lekë. 177 studentë që ndjekin programe me përparësi kombëtare do të marrin nga 50 mijë lekë në muaj. Për herë të parë, mbështetja financiare për studentët e këtyre programeve do të shtrihet edhe në ciklin Master’’, tha Kumbaro.

Një pjesë e buxhetit do të shkojë edhe për përmirësimin e kushteve në konvikte.

 “Për këtë qëllim janë parashikuar 375 milionë lekë, ose rreth 4 milionë euro, që do të mbështesin akomodimin e 7 mijë deri në 7 500 studentëve. Financimi total për konviktet do të arrijë në rreth 900 milionë lekë në vit, ose 9.5 milionë euro. Këto fonde, synojnë përmirësimin e kushteve të jetesës së studentëve në konviktet e Tiranës, Kamzës, Vlorës, Korçës, Shkodrës, Elbasanit dhe Gjirokastrës”, vijoi ajo.

Kumbaro tha se risi do të ketë edhe në programin ‘Pas Shkolle’’, i cili aktualisht aplikohet në 408 shkolla.

“Programi ‘Pas shkolle’ do të vijojë duke u zgjeruar edhe me dy orë në ditë, duke e shtuar kohën e qëndrimit të fëmijëve në shkollë maksimalisht deri në orën 17:00, por edhe duke ofruar module të reja”, theksoi Kumbaro.

Për ndërtimin dhe rikonstruksionin e objekteve arsimore, gjatë periudhës 2027–2029 planifikohen rreth 120 projekte, me një vlerë prej rreth 88 milionë eurosh. Vetëm gjatë vitit 2027 do të vijojë financimi i 54 projekteve, përfshirë 40 shkolla e kopshte dhe 14 shkolla të mesme, me një fond prej rreth 2.2 miliardë lekësh.

Rendit zhvillimet sipas orarit:
Ora 13:14
Shkolla deri në orën 17:00, Kumbaro prezanton ndryshimet për vitin 2027: Një mësues ndihmës për çdo fëmijë me aftësi ndryshe (VIDEO)

 

Fëmijët do të mund të qëndrojnë në shkollë deri në orën 17:00, ndërsa nxënësit me aftësi ndryshe do të kenë nga një mësues ndihmës secili. Këto janë dy nga ndryshimet që ministrja e Arsimit, Mirela Kumbaro, prezantoi në Komisionin për Edukimin, Shkencën dhe Sportet gjatë diskutimit të projektbuxhetit për vitin 2027.

Sipas Kumbaros, programi “Pas shkolle” do të zgjerohet me dy orë në ditë, duke e çuar kohën maksimale të qëndrimit të fëmijëve në shkollë deri në orën 17:00. Për këtë program dhe mësuesit e angazhuar janë parashikuar 500 milionë lekë, ndërsa do të shtohen edhe module të reja.

“Programi ‘Pas shkolle’ do të vijojë duke u zgjeruar edhe me dy orë në ditë, duke e shtuar kohën e qëndrimit të fëmijëve në shkollë maksimalisht deri në orën 17:00, por edhe duke ofruar module të reja”, tha Kumbaro.

Një tjetër ndryshim i parashikuar për vitin 2027 është vendosja e një mësuesi ndihmës për çdo fëmijë me aftësi ndryshe. Aktualisht, sipas ministres, raporti është një mësues ndihmës për katër fëmijë.

Ministrja bëri të ditur se numri i nxënësve me aftësi ndryshe në sistemin parauniversitar ka arritur në 6039 këtë vit shkollor, nga rreth 4000 që ishin në vitin shkollor 2024-2025. Ajo shpjegoi se Ministria e Arsimit ka zgjeruar edhe grupmoshat që përfitojnë mbështetje, duke përfshirë fëmijët dhe të rinjtë nga 3 deri në 19 vjeç, ndërsa për një kategori mosha është rritur deri në 21 vjeç.

Sa i përket financimit, Kumbaro tha se arsimi parauniversitar do të marrë mbi 1 miliard lekë më shumë krahasuar me vitin 2026.

Për ndërtimin dhe rikonstruksionin e objekteve arsimore, gjatë periudhës 2027–2029 planifikohen rreth 120 projekte, me një vlerë prej rreth 88 milionë eurosh.

Vetëm gjatë vitit 2027 do të vijojë financimi i 54 projekteve, përfshirë 40 shkolla e kopshte dhe 14 shkolla të mesme, me një fond prej rreth 2.2 miliardë lekësh. Ndërkohë, 700 milionë lekë të tjera janë parashikuar për rreth 40 projekte të reja.

U.D/Shqiptarja.com