Kryetari i Partisë së Lirisë Ilir Meta akuzoi sot Qeverinë shqiptare se nuk e ka prioritet arsimin e as të rinjtë, meqenëse edhe pse buxheti i arsimit është më i ulëti në rajon, është i pari që preket nga qeveria në raste emergjence.

“Buxheti i Arsimit, më i ulëti në rajon, flet më shumë se çdo gjë tjetër, jo vetëm për dështimin e premtimit që Buxheti për Arsimin do të ishte 5%, që ishte një mashtrim i madh, por njëkohësisht, ne e dimë se sa herë qeveria prek buxhetin kur kalon ndonjë akt normativ, të parin që prek është Arsimi, siç bëri edhe këtë vit duke i hequr 15 milionë dollarë. Dhe, të parat për të cilat shton fondet janë koncesionet korruptive ku është e përfshirë në mënyrë të drejtpërdrejtë”, u shpreh Meta.

Meta tha se një Qeveri që nuk ka prioritet arsimin, nuk ka se si të ketë prioritet rininë dhe të ardhmen e saj. Buxheti për Arsimin nuk duhet të preket as në kohë krizash!