Kështu ndodhi me Syri dhe Gazeta Express, në redaksinë e së cilës punojnë gazetarë që unë i njoh prej kohësh. “E dimë që është e rreme ajo që kemi botuar, por ca gjëra janë më të mëdha se ne”, u justifikuan ata të gjorë. Në më shumë se 35 vjet karrierë gazetarie, unë nuk kam shkruar kurrë një lajm të cilin e dija që ishte i gënjeshtërt dhe nuk kam pranuar kurrë që asnjë botues, politikan apo kushdo tjetër të më urdhëronte të botoja një lajm fals. Kam preferuar më mire të shkoj në një gazetë tjetër. Kjo është një çështje etike personale, jo çështje rroge.
“Fake news”-i i fundit, prodhuar nga këto dy portale që kam cituar, ka të bëjë me një takim timin në Tiranë me Roberto Baldassarin, president i Institutit Piepoli, më i rëndësishmi institut italian në fushën e sondazheve politike, që ka ndër klientët e tij Radiotelevizionin publik italian (RAI). Ai erdhi në Tiranë për ta prezantuar direkt (siç bëri edhe një javë më parë), në televizionin tim Report TV, sondazhin e dytë mbi zgjedhjet politike, që televizioni im ia kishte porositur dhe paguar dhe, për mirësjellje, vendosa ta takoj në hotel tri orë para transmetimit. Ndonjë nga ata që bëjnë “scoop”-e të rastit ka fotografuar në hotel këtë takim “tepër sekret”, që u bë publikisht: ai po hante drekë dhe unë isha ulur përballë tij. Kjo është e padëgjuar: Kam një kontratë me institutin e tij, unë paguaj dhe ai kryen një shërbim për televizionin tim, por nuk duhet të takohemi!!!
Të njejtët prodhues të “fake news”-ave duhet ta kenë kuptuar se ajo fotografi nuk mjaftonte për të bërë një “scoop” të rremë dhe kështu që kanë shpikur se paskan dëgjuar edhe atë për çka flisnim. Dhe kështu, sipas “përgjimit”, unë i paskam dhënë urdhëra Baldassarit (president i një instituti me famë në Evropë) të modifikonte rezultatet për ta nxjerrë fituese Partinë Socialiste dhe për të minimizuar rezultatet e partive të tjera. Si të thuash se unë do ta paguaja Institutin më të madh të sondazheve në Itali që ai të publikonte sondazhe të shpikura nga unë! Dhe Baldassari do të pranonte të komprometonte besueshmërinë e institutit të tij për të më bërë mua një nder! A nuk do të ishte më me leverdi të shpikej ndonjë farë “ganibobi”, siç bëri Partia Demokratike vite më parë?
E pabesueshmja është se kjo “fake news” (të bën për të qeshur edhe kur e tregon) u interpretua si një lajm i vërtetë, jo vetëm nga mediat e tjera, që ushqehen me “fake news”, në pamundësi të prodhojnë lajme të vërteta, por edhe nga ata politikanë, të cilëve duket se nuk u pëlqyen rezultatet e sondazhit (të nxjerra nga Instituti Piepoli, jo nga unë) dhe, nga ana e tyre, e shpërndanë atë gjatë intervistave televizive dhe nëpër mitingje.
Tani porosita avokatët e mi të ngrenë padi kundër dy portaleve, siç kam bërë edhe me të tjera që kanë shkruar gënjeshtra kundër meje. Shpresojmë vetëm që Gazeta Express dhe Syri të kenë një NIPT, një botues, një kryeredaktor përgjegjës dhe një adresë reale, në të cilën Gjykata të mund t’iu dërgojë ftesën për të ardhur në gjyq. E të mos bëjnë si minj te tjerë që, për t’iu shmangur drejtësisë, ta deklarojnë edhe adresën e shtëpisë së tyre “adresë e panjohur”. Pa pikë turpi, pikërisht ashtu siç bëjnë prodhuesit e “fake news”-ave, apo hajdutët.
Redaksia Online
Shqiptarja.com
Lajme të tjera
-
Ilir Yzeiri: Amnistia dhe sqarimi i (pa)nevojshëm i Bolinos
27 Tetor, 10:40
-
Carlo Bollino: Duhet një amnisti? Një sqarim për ata që e kritikojnë pa e lexuar (ose nuk duhet ta kuptojnë) pyetjen time
26 Tetor, 17:16
-
Carlo Bollino: SPAK dhe Amnisti: Një rrugë e mundshme për një drejtësi të pranueshme dhe paqe politike?
25 Tetor, 14:53
-
Carlo Bollino ironizon familjen Berisha: Përpara më etiketonin si ''fashisto-komunist'', tani jam ''peng'' por njëkohësisht edhe ''anëtar'' i SPAK!! Ata janë komplet në panik, i mirëkuptoj
20 Shtator, 12:27
-
Carlo Bollino: Berisha nuk meriton të fitojë zgjedhje jo vetëm se është i korruptuar, por mbi të gjitha se ka mbetur një diktator!
19 Shtator, 16:56
-
Berisha në sulm: Bollino është anëtar i organizatës kriminale të SPAK! Bollino i përgjigjet: E vlerësoj, por jam thjesht një gazetar i fakteve!
18 Shtator, 17:17 -
Carlo Bollino: ''Vakëf'' dhe ''VKM e personalizuar'', Berisha dhe dhëndri do të përgjigjen penalisht për shpifjet e presionet ndaj meje!
11 Shtator, 21:09
-
Carlo Bollino: Opozita në duart e Berishës dhe rrjeta e merimangës që po e çon drejt humbjes së dhjetë
9 Shtator, 19:07
-
Në Bunk’Art2 hapet 'Dhoma e Manipulimeve': Për herë të parë tregohet lidhja mes iluzioneve optike dhe propagandës komuniste
5 Gusht, 16:08 -
Carlo Bollino: Mbyllja e “Gazetës Shqiptare”, pak hipokrizi, por shumë histori e vlera ikin me të
1 Gusht, 20:01
-
Carlo Bollino: Nga Franca paralajmërim për Berishën, populli mund të bashkohet kundër opozitës kur e konsideron më të rrezikshme se qeverinë
9 Korrik, 13:16
-
Carlo Bollino: Onkologjiku një akuzë për të gjithë, por dhe detyrim për ndryshim!
27 Qershor, 18:27
