E ftuar në emisionin e mëngjesit “Rreze Dielli” në Report TV, ishte kampionia Europiane dhe rekordmenia Luiza Gega, së bashku me trajnerin e saj Taulant Stërmasi. Ajo së fundmi ka marrë statusin e Koloneles nga Kryeministri Rama, si një sportiste elitare.

”Në karrierën time kam patur momente që doja të hiqja dorë nga atletika, por trajneri nuk më ka lënë që të nxitohem e të prishja karrierën” e nis kështu rrëfimin sportistja elitare që na ka bërë të gjithëve krenar.

”Siç dihet, ky sport ka shumë shpenzime, shumë vështirësi dhe kosto pa të cilat nuk mund të bëhet” tha më pas ajo.

E pyetur nga moderatorja se cila ishte formula e saj e suksesit, Luiza tha se këmbëngulja, disiplina dhe mbështetja nga trajneri prej 16 vitesh, kanë qenë vendimtare. ”Që te jesh sportiste elitare është angazhim i madh dhe gjërat nuk kanë qenë të lehta, por ia kam dalë duke ngritur flamurin shqiptar në botë” shtoi ajo.

Në bisedë ata thanë se nuk kanë munguar ofertat për të përfaqësuar flamurin e vendeve të tjera, por Luiza nuk ka pranuar pasi është shumë krenare për Shqipërinë.

“Që të jesh një sportiste elitare, duhet të dalësh nga zona e rehatisë, duke tejkaluar veten me shumë sakrifica” tha trajneri Taulant Stërmasi.  

“Luiza ka nevojë për disa kushte specifike për të qenë më e mira, ajo stërvitet disa herë në vit në Dardhë të Korçës, Kenia apo Portugali, për shkak të kushteve specifike që i duhen një atleti” shtoi më pas ai.

Luiza Gega është Kampionia e artë e Europës. Ajo është rekordmenia absolute Kombëtare, 9 herë Kampione Ballkani, 3 herë Kampione Mesdheu, disa herë finaliste në Botëror, në lojrat olimpike në disiplinën e saj 3000 metra me pengesa. Për të artën e Europës, nuk ka pengesa të pa kapërcyeshme. Ajo mban rekordin në vrapimin 800, 1500 dhe 3000 metra, ndërsa projektet e saj ambicioze për në vazhdim janë Lojrat Olimpike 2024, si dhe në gusht Kampionati Botëror i Atletikës.