Emocione, gola dhe surpriza kanë karakterizuar mbrëmjen e sotme në Champions League, ku stadiumi “Anfield” u kthye në skenën e një fitoreje të madhe për Liverpoolin ndaj Real Madridit. “Të kuqtë” triumfuan minimalisht 1-0 në një përballje të zjarrtë, e cila u zhbllokua vetëm në minutën e 60-të.

Pjesa e parë përfundoi pa gola, megjithëse rastet e pastra dhe tensioni nuk munguan. Në fraksionin e dytë, “Anfield” shpërtheu kur Dominik Szoboszlai harkoi saktë nga një goditje dënimi dhe Alexis Mac Allister mposhti Courtois për golin e vetëm të takimit. Portieri belg ishte një nga më të mirët për Realin, duke ndalur disa tentativa të rrezikshme, por nuk mundi të shmangte rrjetën e argjentinasit, lojtar që ndodhet në radarin e madrilenëve për merkaton e verës që vjen.

Në Paris, Bayern Munich vazhdoi marshimin perfekt në këtë edicion, duke regjistruar fitoren e 16-të radhazi. Kampionët e Gjermanisë triumfuan 1-2 ndaj PSG-së, kampiones në fuqi të Europës, në “Parc des Princes”. Luis Diaz ishte protagonist absolut me dopietën e tij në minutat 3’ dhe 32’, ndonëse u ndëshkua me karton të kuq në shtesën e pjesës së parë. Për vendasit, Joao Neves ngushtoi diferencën në minutën e 73’ me një gol akrobatik, por pa mundur të ndryshojë fatin e sfidës. Me këtë fitore, Bayern mban kreun e grupit me 12 pikë në 4 ndeshje, njësoj si Arsenali dhe konfirmohet si favorit kryesor për trofeun e Champions League këtë sezon.

Në Torino, Luciano Spalletti debutoi në stolin e Juventusit me një barazim 1-1 ndaj Sporting Lisbon. Portugezët kaluan të parët në avantazh me Maximiliano Araujo në minutën e 12-të, ndërsa Dusan Vlahovic barazoi pas një asisti të Thuram në të 34-ën. Në minutat e fundit u aktivizua edhe Edon Zhegrova, por pa ndikuar në rezultat.

Në Londër, Tottenham konfirmoi formën e shkëlqyer me një fitore të thellë 4-0 ndaj Copenhagen. Brennan Johnson zhbllokoi rezultatin në minutën e 19-të, ndërsa në pjesën e dytë shënuan edhe Odobert (51’), Micky van de Ven (64’) dhe Joao Palhinha (67’), për një mbrëmje perfekte në “Tottenham Hotspur Stadium”.

Fitore për Arsenalin, Atletico Madridin dhe Monaco. Napoli u ndal në barazim pa gola kundër Eintracht. Të mërkurën luhen edhe nëntë ndeshjet e radhës për raundin e katërt në fazën e ligës.

Champions League, raundi 4-t:

E martë, 04 nëntor 2025

18:45

Napoli 0-0 Eintracht Frankfurt

Slavia e Pragës 0-3 Arsenal

21:00

Atletico Madrid 3-1 Royale Union SG

Bodo/Glimt 0-1 Monaco

Juventus 1-1 Sporting Lisbone

Liverpool 1-0 Real Madrid

Olympiacos 1-1 PSV

PSG 1-2 Bayern Munich

Tottenham 4-0 FC Copenhagen

Renditja:

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 3 Dhjetor, 08:56

    Çfarë mendoni për lëvizjen e Salianjit brenda PD?

Lajme të tjera