Chat Gpt pritet të bëhet pjesë e përditshmërisë në shkolla. Në udhëzuesin e publikuar nga Agjencia e Sigurimit të Cilësisë së Arsimit Parauniversitar, përcaktohen mënyrat se si Inteligjenca Artificiale mund të përdoret në klasë pa zëvendësuar aftësitë njerëzore.

Mësuesit mund ta shfrytëzojnë për të përgatitur materiale mësimore, nga ushtrimet dhe pyetjet, te përmbledhjet, shpjegimet, provimet e deri të vlerësimi i nxënësve.

Inteligjenca artificiale mund të përdoret si një mjet shtesë në procesin mësimor,  nga gjuha shqipe e gjuhët e huaja, te matematika, artet apo edhe edukimi fizik.

Ajo mund të shërbejë edhe për përkthimin e teksteve, korrigjimin e gabimeve gjuhësore apo përshtatjen e materialeve sipas nivelit të nxënësve.

Por, si do të përdoret konkretisht në klasë? Udhëzuesi sjell edhe shembuj praktikë se si një nxënës mund t’i kërkojë ndihmë inteligjencës artificiale.

“Shpjego konceptin me fjalë të thjeshta, sikur po ia shpjegon një nxënësi të kësaj klase. Jep edhe një shembull nga jeta e përditshme”, thuhet në udhëzues.

Megjithatë, krahas mundësive, evidentohen edhe rreziqet. Dezinformimi, varësia digjitale dhe përdorimi joetik i përmbajtjeve të gjeneruara nga IA janë disa prej sfidave që vë në dukje ky udhëzim.

“Shmangia e plagjiaturës kërkon që nxënësit të mësojnë të dallojnë ndërmjet ndihmës së pranueshme dhe kopjimit. Përdorimi i IA-së për të kuptuar një koncept, për të marrë sugjerime ose për të përmirësuar një draft mund të jetë i pranueshëm, nëse nxënësi mendon, përpunon dhe krijon vetë. Por kopjimi i drejtpërdrejtë i përgjigjeve të IA-së, cenon integritetin akademik. Për të nxitur përdorimin e ndershëm, mësuesi mund t’u kërkojë nxënësve të shpjegojnë procesin e punës, jo vetëm produktin përfundimtar”, thuhet më tej.

Për këtë arsye, nxënësit dhe mësuesit udhëzohen që çdo informacion i prodhuar nga inteligjenca artificiale të verifikohet dhe të mos merret automatikisht si i saktë.


 

Kliko këtu për të parë raportin e plotë