TIRANË- Ministri i Brendshëm, Taulant Balla nuk ka kursyer kritikat për paraardhësin e tij në këtë detyrë, Bledi Çuçin. Në një reagim në rrjetet sociale Balla ka kritikuar Çuçin se ka lënë pa paguar gjobat e makinës së Ministrisë së Brendshme për shkeljet e rregullave të qarkullimit rrugor. Kritikave nuk u ka shpëtuar as Policia e Shtetit, për të cilën Balla thotë se nuk ka ekzekutuar vendimet e gjobave përkatëse dhe se një gjë e tillë nuk duhet të ndodhë më.

Gazetari i Report Tv, Sokol Dema ka mësuar se bëhet fjalë për tre gjoba të papaguara, konkretisht më 26 janar 2022 makina e Ministrisë së Brendshme është gjobitur në Tiranë me 1000 lekë, por me kamatë vonesën vlera e gjobës ka shkuar në 1760 lekë.  Po me të njëjtën vlerë është gjobitur edhe më 19 dhjetor 2021. Ndërkohë, më 6 korrik 2022 makina e Ministrisë së Brendshme është gjobitur në Lushnjë me 20 mijë lekë, ndërsa me kamatë vonesë vlera e gjobës ka shkuar në 3270 lekë.

“Sot i kam tërhequr vëmendjen strukturave të Policisë së Shtetit për lejimin e akumulimit të gjobave për shkeljet e rregullave të qarkullimit nga ana e automjetit të Ministrit të Brendshëm! Është për të ardhur keq, sepse përveç të tjerash ministrat nuk i drejtojnë makinat vetë dhe s’ka pse emrat e tyre të përfliten nëpër portale apo tv (siç ndodhi sot me paraardhësin tim që sapo la detyrën) për shkak se Policia e Shtetit nuk ekzekuton vendimet e gjobave përkatëse! Uroj që kjo kujtesë t’u shërbejë të gjithëve për të bërë detyrën e tyre sipas ligjit”, shkruan Balla.

Balla shkruan se as eskorta e kryeministrit Rama dhe as automjetet e tjera zyrtare të ministrave e deputetëve nuk mund të shkelin rregullat e qarkullimit përveçse në raste emergjencash të lidhura me detyrën.

“Standardi i vendosur nga kryeministri Rama qysh në ditën e parë të marrjes së detyrës nga ana e tij, ka qenë i qartë. Eskorta e kryeministrit e para dhe më pas të gjitha automjetet e tjera zyrtare të ministrave, deputetëve e me radhë, nuk mund të shkelin rregullat e qarkullimit përveçse në raste emergjencash të lidhura me detyrën. Ai standart i dha fund spektakleve prej të fortësh në rrugët e Tiranës mëngjes, drekë, darkë me sirena e me kapërcime semaforësh, të kategorive të lartpërmendura”, shkruan Balla.

Në fund Balla u bën thirrje gjithë instancave shtetërore që të bëjnë detyrën e tyre sipas ligjit.

Rendit zhvillimet sipas orarit:
Ora 22:17
Balla e kritikoi, ish-ministri Çuçi nuk ka paguar tre gjoba për shkeljet me makinën e Ministrisë së Brendshme

Ministri Taulant Balla ka kritikuar sot ish-ministrin e Brendshëm Bledi Çuçi se nuk kishte paguar gjobat e makinës së Ministrisë së Brendshme. Bëhet fjalë për tre gjoba të papaguara 26 janar 2022, 6 korrik 2022, 19 dhjetor 2021.

Balla shkroi se as eskorta e kryeministrit e para dhe më pas të gjitha automjetet e tjera zyrtare të ministrave, deputetëve e me radhë, nuk mund të shkelin rregullat e qarkullimit përveçse në raste emergjencash të lidhura me detyrën. 

 

SI.E./Shqiptarja.com