Çuçi: Shumë shpejt shoferët do njoftohen elektronikisht për shkeljet që bëjnë! Do rikthejmë kamerat e trupit për policët

TIRANË- Shumë shpejt një shofer do të njoftohet në mënyrë elektronike për shkeljet që ka bërë. Ka qenë ministri i Brendshëm, Bledi Çuçi që ka bërë publik lajmin, duke theksuar se kjo është një mënyrë që të shmangen kontakti i drejtpërdrejtë i policëve me qytetarët. 

“Kemi kaluar nga patrulla policie që të ndalonin ndonjëherë edhe pa shkak, në përdorimin e radarëve automatikë dhe makinave inteligjente duke ulur kështu kontaktin e qytetarit me punonjësin e policisë që në shumë raste ishte edhe burim ryshfeti. Së shpejti do të kalojmë në njoftimin elektronik të menjëhershëm të qytetarit në rast shkeljeje dhe do të vijojmë investimet në teknologji e pajisje dixhitale për të rritur cilësisht punën e Policisë. Vetëm vitin e ardhshëm kemi parashikuar 7.6 herë më shumë investime në Teknologji në Policinë e Shtetit”, tha ministri Çuçi.

Duke marrë shkas nga përfshirja e efektivëve të policisë në ngjarje kriminale, rasti më i fundit ai me Lear Kurti, Ministri i Brendshëm, Bledi Çuçi ka konfirmuar se do të rikthehen kamerat e trupit për patrullat e policisë. Çuçi theksoi se Policia do të investojmë 7.6 herë më shumë në teknologji!

“Pavarësisht këtyre arritjeve me ndihmën edhe të programit suedez, ne jemi në një përpjekje të vazhdueshme për të përmirësuar punën e policisë, rritjen cilësore të shërbimit që ajo i ofron publikut, një zbatim tërësor të filozofisë së policimit në komunitet. Në objektivat tona është shtrirja e përdorimit të kamerave të trupit për punonjësit e patrullave të policisë. Kjo do të rrisë më tej transparencën në punën tonë gjatë kontakteve me publikun, rritjen e cilësisë së shërbimit dhe evidentimin e rasteve të mundshme të abuzimeve. Dëshirojmë t’i japim një zhvillim të mëtejshëm Komisariatit Dixhital, si një formë që ka rezultuar e suksesshme për raportimin e shkeljeve nga qytetarët”, u shpreh Ministri i Brendshëm.

Sipas Çuçit, tashmë policia është ndër institucionet më të besueshme në vend.

“Indeksi i pëlqyeshmërisë së qytetarëve ndaj punës së policisë ka pësuar një rritje domethënëse nga 36% në vitin 2013 në 59% në vitin 2022. Ky është një fakt që tregon se të gjithë përpjekjet tona duket që janë shpërblyer. Kjo s’mund të arrihej pa partnerë si qeveria suedeze përmes këtij projekti”, deklaraoi ministri Çuçi.

Këto deklarata Çuçi i bëri në konferencën përmbyllëse të projektit “Forcimi i Policimit në Komunitet” i financuar nga qeveria suedeze.

B.K./Shqiptarja.com

TAG:
• ministria e brendshme
• Bledi Cuci