TIRANË - Regjisori Robert Budina dhe arkitekti e restauratori Kreshnik Merxhani u shoqëruan nga policia këtë të martë, pasi bënë një deklaratë për mediat në agoren e Teatrit Kombëtar, ku ishin të pranishëm rreth dhjetë persona (aktorë dhe anëtarë të aleancës). Edhe pse kishin ruajtur distancën mes njëri-tjetrit me 1 metra largësi, policia i ka shpërndarë përfaqësuesit e Aleancës për Mbrojtjen e Teatrit Kombëtar, pasi në masat kufizuese të marra nga qeveria për parandalimin e koronavirusit, nuk lejohet dalja nga shtëpia nëse nuk është për të blerë ushqime e ilaçe apo arsye të tjera emergjente.

Shoqërimi i Budinës dhe Merxhanit  u bë pasi ishin ata dy personat që mbajtën komunikatën për mediat në ambientet e jashtme të Teatrit.

Por për çfarë ishte konferenca?

Teatri Kombëtar në Shqipëri është zgjedhur si një nga 7 vendndodhjet e trashëgimisë më të rrezikuara për vitin 2020 nga Europa Nostra.

7 vendndodhjet e tjera, që mbrohen për këtë vit nga Europa Nostra janë Kështjella Jezefi në Republikën Çeke, Kështjella e Sammezzanos në Toskana të Italisë, Blloku Y, lagjia qeveritare në Novergji, Centrali elektrik në Poloni, Fortesa e Beogradit dhe rrethinat e saj në Serbi, Stadiumi Pleçnik në Slloveni dhe Teatri Kombëtar, me motivacionin,

“Teatri Kombëtar i Shqipërisë, si shembull i jashtëzakonshëm i arkitekturës moderneitaliane të viteve 1930, i cili është një nga qendrat më të spikatura kulturore në vend, përballet me rrezikun më të afërt të shembjes”.

Euopa Nostra është zëri i shoqërisë civile e angazhuar për mbrojtjen e trashëgimisë kulturore dhe natyrore, ka mbështetjen e Institutit të Bankës Europiane të Investimeve.