“Mua më ndodh për herë të parë pas 4 vitesh në këtë eksperiencë që të më vijë një kamikaz”, këto ishin fjalët e gazetarit Denis Dyrnjaja ndaj këshilltari ligjor i Partisë Demokratike Marash Logu, në emisionin “Top Talk” mbrëmjen e djeshme i cili u mbyll papritur.

Incidenti i pazakontë dhe fjala “Kamikaz”, erdhi pas një debati të lindur për shkak të kohës televizive, gjë për të cilën juristi ankohej vazhdimisht. Ai akuzoi gazetarin se po i censuronte fjalën dhe nuk po i jepte hapësirën e duhur për të folur rreth cështjes së inceneratorëve.Logu kërkoi të dinte nga gazetari nëse do t’i vinte koha për të folur pasi kishte 10 minuta që po qëndronte i heshtur.

Aq mjaftoi që situata të agravonte dhe Dyrnjaja ta quante atë “kamikaz”, fjalë që revoltoi Logun. Në fund, emisioni u mbyll me largimin e Logut nga studio pasi ia kërkoi Dyrnjana disa herë me radhë.

Biseda në studio:

Marash Logu: Zoti Dyrnjaja, ju lutem unë kam 10 minuta që jam në studion tuaj, nëse nuk doni që të zhvilloj një bisedë me ju më thoni pasi dhe unë kam punët e mia. Unë duhet të them mendimin tim, për shkak se unë bëra një parantezë dhe për shkak të kësaj doni të çensuroni të gjithë fjalën time ju lutem shumë..

Denis Dyrnjaja: Mos u kompleksoni, mos u kompleksoni nga kjo gjë.

Marash Logu: Nuk po kompleksohem për asgjë, më respektoni për prezencën dhe për atë që përfaqësoj.

Denis Dyrnjaja: Kur të jap fjalën, më lejo ta moderoj.

Marash Logu: Po pra me respekt për të ftuarit, ndjesë që po ta them këtë se jeni gazetar me eksperiencë.

Dyrnjaja: Mua me thënë të drejtën më ndodh në herën e parë pas 4 vitesh në këtë eksperiencë që të më vijë një kamikaz dhe të më bëjë një gjë ndryshe në televizion. Për respekt të etikës televizive të mos e vazhdojmë më.

Logu: Të ftuarit vijnë, kundërshtojnë po jo ti quani kamikaz. Dhe unë mund t’ju them kamikaz i medias, çfarë do të thotë kjo, e para kërko falje se është ofendim ti thuash dikujt kamikaz

Dyrnjaja: Unë nuk do të kërkoj falje për këtë rast.

Logu: Ti nuk mund të më censurosh fjalën time zotëri, nëse nuk është me interes dakord..

Dyrnjaja: Uljani zërin zotërisë, të lutem mund të largohesh nga studio, të lutem mund të coheni nga studio.

Logu: Nuk mund të vini të bëni këtë gjë.

Dyrnjaja: Faleminderit, nesër do të shihemi prapë bashkë.

Debati nis në minutën 10:45